Senat tóraǵasy Dariǵa Nazarbaeva Batys Qazaqstan oblysyna jumys sapary barysynda máslihat depýtattarymen, máslihat janyndaǵy Qoǵamdyq keńes múshelerimen jáne Kásipker áielder qaýymdastyǵynyń ókilderimen birqatar kezdesýler ótkizdi, dep habarlaidy "Ult aqparat" joǵary palatanyń baspasóz qyzmetine silteme jasap.
Máslihat depýtattary aimaqtyń damýyna qatysty Jaiyq ózenindegi ekologiialyq jaǵdai, kásipkerlikti damytý, agroónerkásip keshenin qoldaý týraly eń ózekti máselelerdi ortaǵa saldy.
«Múmkin, biz ár oblysqa arnalǵan parlamenttik tyńdaýlar josparlaýymyz kerek shyǵar. Sonda biz jergilikti jerlerdegi adamdardy ne tolǵandyratynyn, sheshilmei jatqan qandai júieli problemalar baryn birden biletin bolamyz. Bul jerde retteýdiń joqtyǵynan nemese onyń jetkiliksizdiginen, bolmasa zańnamalyq bazanyń álsizdiginen sheshilmeitin máseleler týraly sóz bolyp otyr», - dedi D. Nazarbaeva máslihat depýtattarymen kezdesýde.
Senat tóraǵasy máslihat janyndaǵy Qoǵamdyq keńes múshelerimen kezdesýde qazirgi kezde elimizde 4 myńǵa tarta adam jumys isteitin 200-den astam keńes qurylǵanyn eske saldy. Sondai-aq, «qoǵamdyq keńesterdiń mindeti – qabyldanatyn sheshimderge turaqty saraptama jasaýdyń esebinen atqarýshy jáne zań shyǵarýshy biliktiń óńirlik organdary jumysynyń sapasyn arttyrý, memlekettik bilik organdarynyń aldyna aimaq halqyn barynsha alańdatatyn ózekti máselelerdi qoia bilý» ekendigin atap ótti.
D.Nazarbaeva Kásipker áielder qaýymdastyǵynyń ókilderimen kezdesý kezinde memlekettik basqarý men elimizdiń saiasi ómirine áielderdiń qatysýyn keńeitýge nazar aýdardy. Onyń pikirinshe, Qazaqstan halqynyń 50 paiyzynan astamyn áielder quraityndyǵyna qaramastan, olar memlekettik qurylymdarda az. «Memlekettik organdar nemese kompaniialardyń basshylarymen qosa, kóptegen jumys berýshiler basshylyq laýazymǵa áielderge qaraǵanda er adamdy kóbirek alatyny qupiia emes. Bul jaǵdaidy respýblikalyq ta, aimaqtyq deńgeide de ózgertý kerek», - dedi D.Nazarbaeva.
