Senat depýtaty Murat Baqtiiaruly eldegi oqýshylardyń 1 paiyzy ǵana sapaly bilim alyp jatqanyn synǵa aldy, dep habarlaidy QazAqparat.
«Álemdik bank zertteýi boiynsha eldegi oqýshylardyń 1 paiyzy ǵana sapaly bilim alyp jatyr. Oqýshylardyń basym bóliginiń tańdaý jasaý múmkindigi joq. Olar negizinen eki ne úsh aýysymdyq mektepterde bilim alyp jatyr. Onyń ústine, sońǵy úsh jylda elimizde 1 mln 277 myń sábi dúniege keldi. Bul bilim salasyna túsip turǵan úlken demografiialyq salmaq. Olar úshin keleshekte kem degende 3 myń mektep salynýy kerek», - dep atap ótti depýtat Senat otyrysynda.
Álemdik banktiń zertteýinshe, qazir elimizdegi adam kapitalynyń indeksi 63 paiyzdy kórsetedi. Bul – indeks bala týǵannan bastap 18 jasqa deiingi qalyptastyrylýy tiis oqýshylardyń qabileti men daǵdylarynyń jiyntyǵy.
«Bizdiń bilim júiesi osylardyń 63 qana paiyzyn berip otyr. Bul bilim salasyna qyrýar qarjy bólingenimen, kóptegen bilim alýshylardyń alǵan bilimi biliktilikke ainalmai jatqanyn kórsetedi. Bizdegi bilim berýdegi teńsizdik pen alshaqtyq qarjylandyrý salasynda da, qala men aýyl mektepteriniń arasynda da aitarlyqtai úlken. Mysaly Nazarbaev ziiatkerlik mektebi men qarapaiym mektep arasyndaǵy qarjylandyrý aiyrmasy 6 ese bolsa, elimizdegi oqýshylardyń 44 paiyzyn quraityn aýyl oqýshylaryna NZM oqýshysynyń bilim deńgeiin qýyp jetýi úshin 6 jyl ýaqyt kerek.
Bilim jáne ǵylym ministrligi qazirgi erejege sai 200-den astam qyzmet kórsetedi. Atap aitqanda, 900 myń búldirshini bar 10 300 balabaqsha, 3,5 mln oqýshy oqityn 7 500 orta mektep, 500 myń kontingenti bar 820 kolledj, 600 myń stýdenti bar 120 JOO jáne jarty millionnan astam muǵalimder men pedagogterdiń jumystaryn úilestirý kerek. Bul bir ministrlikke óte úlken salmaq. Sondyqtan da keshe ǵana Prezidentimiz aitqandai, ministrliktiń basqarý júiesin ońtailandyrý joldaryn qarastyrǵan durys dep sanaimyz», - dedi Murat Baqtiiaruly.
