Nursultan Nazarbaev jumys saparymen Jambyl oblysyna bardy, - dep habarlaidy "Ult aqparat" Elbasy.kz saityna silteme jasap.
Qazaqstannyń Tuńǵysh Prezidenti aldymen Jambyl oblysynyń ákimi Berdibek Saparbaevpen kezdesti. Kezdesýde Elbasyǵa áskeri qoimadaǵy jarylystan zardap shekken Baizaq aýdany turǵyndaryna kómek kórsetý sharalary jáne qalpyna keltirý jumystary týraly málimet berilgen.
"Jambyl oblysynyń ákimi Elbasyǵa óńirdiń áleýmettik-ekonomikalyq damýy, "Nur Otan" partiiasynyń sailaýaldy baǵdarlamasynyń júzege asyrylý barysy jaily, sondai-aq agrarlyq sektordaǵy máselelerdi sheshýge jáne halyqty jumyspen qamtýǵa baǵyttalǵan sharalar týraly baiandady. Qazaqstannyń Tuńǵysh Prezidenti óńir basshylyǵynyń jumysyna oń baǵa berdi", - delingen habarlamada.
Kezdesýden keiin Elbasy "Áljan ana" tarihi mýzeiiniń qyzmetimen tanysyp, mekeme aýmaǵyna aǵash otyrǵyzý rásimine qatysty. Qazaqstannyń Tuńǵysh Prezidenti sondai-aq aýyldaǵy Mádeniet úiine bardy. Bul Mádeniet úiinde kitaphana jáne túrli úiirmeler jumys isteidi, 250 oryndyq kontsert zaly bar. Nazarbaev Jambyl oblystyq filarmoniiasynyń artisteri men aýdandyq Mádeniet úiiniń shákirtteri oryndaǵan mýzykalyq shyǵarmalardy tyńdady.
Qazaqstannyń Tuńǵysh Prezidenti sondai-aq sporttyq-saýyqtyrý kesheniniń jumys barysymen tanysty. Atalǵan keshende aýqymdy arena, ámbebap zal jáne kúres pen boksqa arnalǵan zal bar. Búginde sporttyq-saýyqtyrý kesheninde tórt júzden astam bala men jetkinshek sporttyń erkin kúres, thekvondo, karate, voleibol, fýtbol, boks syndy alty túri boiynsha jattyǵady.
