Jaqsylyqty jadynda saqtai bilgen eldiń rýhy qashanda biik. Bul týraly búgin QR Parlamenti palatalarynyń birlesken otyrysynda Elbasy Nursultan Nazarbaev aitty, dep habarlaidy QazAqparat.
«Bul Naýryz aiynyń elimizdiń Táýelsizdik kúntizbesinde erekshe orny bar ekenin bilemiz. Kóktemniń alǵashqy kúninde biz Alǵys aitý kúnin atap ótemiz. Sonymen birge Qazaqstan halqy Assambleiasynyń qurylǵan kúni. Ulystyń uly kúni - Naýryz meiramy shýaqty kóktem aiynyń enshisinde. Qymbatty áielderimizdiń de merekesin naýryz aiynda atap ótemiz. Osy izgi oqiǵalardyń bári Qazaqstan halqyn biriktire túsedi. Rýhani jańǵyrý baǵdarlamasy da osyǵan baǵyttalǵan. Biz eldiń birligi men memlekettiń syndarly saiasatynyń arqasynda barlyq synyqtardan sizdermen birge ótip kele jatyrmyz. El iesi qazaq halqynyń mańynda uiysqan barsha etnostar muny joǵary baǵalaidy. Ózderińiz bilesizder búginde Almaty, Batys Qazaqstan, Jambyl jáne Ońtústik Qazaqstan oblystarynda «Qazaq eline myń alǵys» atty monýmentter boi kóterdi. Osynaý izgi bastamalar halqymyzdyń keń peiili men darqan kóńilin kórsetedi», - dedi Elbasy.
QR Prezidentiniń aitýynsha, jaqsylyqty jadynda saqtai bilgen eldiń rýhy qashanda biik bolady.
«Bul aitýǵa ońai siiaqty kórinedi. Al bul bizdiń býyn basynan keshken oqiǵa. Taýar vagondarymen lek-legimen Soltústik Kavkazdan, Shyǵystan, Volgadan alyp kelgen bosqyndardy aidalaǵa tastap, ár úige bala-shaǵalarymen tyqpalap, biz qabyldaǵanbyz. Sonyń biri meniń ákemniń otbasy bolatyn. Sondyqtan osylai ózderi kelgen jurt, etnostar kóńilin bólip, rizashylyǵyn bildirip jatqany qazirgi urpaqqa ata-analarynyń bergen ósieti dep sanaimyn. Ol úshin barshalaryna raqmet aitqanymyz jón», - dedi Nursultan Nazarbaev.
