Qazaqstannyń Tuńǵysh Prezidenti Nursultan Nazarbaev "týystarynyń zań buzǵany dáleldense, tiisti jazasyn alýy kerek" dep sanaidy. Bul týraly ol saiasattanýshy Daniiar Áshimbaevqa telefon arqyly bergen suhbatynda aitty, dep habarlaidy Sputnik Qazaqstan.
Saiasattanýshy Nazarbaevtan zańsyz baiydy degen kúdikke ilingen týystary týraly ne oilaitynyn suraǵan.
"Biz uzaq jyl boiy Qazaqstanda quqyqtyq memleket quryp kelemiz. Onyń negizgi qaǵidaty: zań – bárine ortaq. Eger týystarymnyń biri zańdy buzý úshin meniń atymdy jamylsa, onda olar tiisti jazaǵa tartylýy kerek. Onyń kinási sotta dáleldenýge tiis. Ár azamat zańdy túrde qorǵanýǵa quqyly ekenin umytpaǵan jón", - dedi Nazarbaev suhbatynda.
Elbasy kúieý balasy Rahat Álievke qatysty oqiǵany eske aldy.
"Ol meniń qyzymnyń kúieýi boldy. Ulym siiaqty edi, jienderimniń ákesi boldy. Biraq soǵan qaramastan, memleket onyń zańǵa qaishy áreketterine kóz juma qaraǵan joq. Qazaqstan soty ony sottady. Biraq ol qashyp úlgerdi, ómir boiy jasyrynýǵa májbúr boldy. Adam qyzyǵarlyq taǵdyr emes", - deidi Nazarbaev.
Ol ózi prezident bolǵan jyldary qazaq halqy úlken jumys atqarǵanyn atap ótti.
"Keibiri muny umytyp barady. Halyq dana jáne munyń bári onyń esinde ekenine senimdimin", - dedi Elbasy.
Sondai-aq, Nazarbaev Qazaqstannyń táýelsizdik jyldaryndaǵy tolaǵai tabystaryna toqtaldy. Ol Qazaqstannyń ekonomikasy Orta Aziiadaǵy búkil eldiń ekonomikasynan eki esege kóp ekenin, Qazaqstan óńirdegi ekonomikalyq lider ekenin atap ótti.
"Biz óz táýelsizdigimizdi nyǵaittyq. Barlyq kórshimen shekaramyzdy shegendedik, qazirgi tańda bizdiń aýmaqqa qatysty daýly másele joq. Táýelsiz bolý úshin memlekettiń álem moiyndaǵan shekarasy, qabiletti armiiasy, ulttyq valiýtasy bolýǵa tiis. Munyń bári buryn bolǵan joq. Buǵan biz men prezident bolǵan jyldary, eldi basqarǵan kezde qol jetkizdik", - dedi Nazarbaev.
