Foto: Elbasy baspasóz qyzmeti
Oliver Stoýnnyń "QAZAQ: Altyn adamnyń tarihy" jobasynyń úshinshi bóliminde Nursultan Nazarbaev liviialyq revoliýtsioner Mýammar Kaddafidiń ókili Semei poligonynyń iadrolyq zymyrandaryn 20 milliard dollarǵa satyp alýǵa qalai keliskenin aityp, altyn salynǵan ushaq týraly qaýesetti joqqa shyǵardy, - dep habarlaidy Tengrinews.kz tilshisi.
Úshinshi bólimde Qazaqstannyń Tuńǵysh Prezidenti Semeidegi iadrolyq poligonnyń jabylýy jáne elden baiytylǵan ýrandy shyǵarýdyń mán-jaiyna toqtaldy.
"Maǵan Margaret Tetcher, Djeims Beiker, Ioshka Fisher myrza (Frantsiianyń burynǵy syrtqy ister ministri) kele bastady. Bári kelip, zymyrandarǵa ne bolǵanyn surady. Men "Toqtańdar" dedim. Bári qyzyǵýshylyq tanytty. (...) Qasym-Jomart Toqaev ol kezde syrtqy ister ministri edi. Ol maǵan birqatar islam memleketinen hat kelgenin, onda Qazaqstan iadrolyq qarýy bar jalǵyz islam memleketi ekenin, "ony saqtap qalyńdar" dep jazylǵanyn aitty. Maǵan Iasir Arafat (Palestina ulttyq ákimshiliginiń burynǵy tóraǵasy - esk.) qonaqqa keldi. Ony bizdiń dostarymyz jibergenin aitty, jaǵdaidy bilý úshin ony Mýammar Kaddafi jiberipti", - dedi Nazarbaev.
Elbasynyń aitýynsha, ol kezde onyń zymyrandardy satý týraly oiy bolmaǵan.
"Men olardy ustaý óte qymbat ekenin, Qazaqstan ony kótere almaitynyn aittym. "Sizge qansha aqsha kerek?". Men ol kezde aqshanyń mólsherin túsinbedim, ásirese dollarda. Oidan shyǵardym da, "20 milliard" dedim. "Bul ázilińiz shyǵar" deýdiń ornyna ol "Men jetkizemin, sizde sonsha aqsha bolady" dedi", - dep eske aldy Nazarbaev Arafatpen áńgimesin.
Stoýn bul aqsha Qazaqstanǵa jetkizildi me dep suraǵanda, Nazarbaev oǵan "joq" dep jaýap berdi, zymyrandardy satýǵa kelispeitinin aitty.
Sondai-aq, Stoýn Qazaqstanǵa altyn salynǵan ushaqtar ushyp kelgeni týraly qaýesetke túsinikteme berýdi ótindi:
"- Altyn salynǵan ushaq kelgenin nemese sol siiaqty qaýeset estip edim.
- Bul - film.
- Demek, bári ótirik qoi?
- Iá".
"Qazaqstan aýmaǵynda úsh iadrolyq zymyran diviziiasy boldy. 104 zymyran, árqaisysynda 10 oqtumsyqtan bar. Bul SS-18 zymyrany, Amerikada ony "Shaitan" dep ataidy. Nelikten bizdiń aýmaqty tańdaǵandaryn suradym. Sóitse, ǵaryshqa shyǵý úshin bul eń yńǵaily traektoriia eken (...) Ushý kezinde jerdiń dóńestigi eskeriledi. Bizdiń zymyrandar Vashingtonǵa 28 minýt ishinde ushyp baratyn. Eger munda zymyrandar toby bolsa, qarsylas jaq ta nysanaǵa alady. Qalai bolǵanda da, Qazaqstan joiylatyn edi", - dedi Nazarbaev.
