Qazaqstannyń Tuńǵysh Prezidenti Iadrolyq synaqtarǵa jappai tyiym salý týraly shart uiymy Daiyndyq komissiiasynyń atqarýshy hatshysy Robert Floidty qabyldady, dep habarlaidy "Ult aqparat" Elbasynyń baspasóz qyzmetine silteme jasap.
Elbasy R.Floidty Iadrolyq synaqtarǵa jappai tyiym salý týraly shart uiymy Daiyndyq komissiiasynyń basshysy bolyp sailanýymen quttyqtap, jaýapty qyzmetine tabys tiledi.
– 29 tamyzda Semei poligonyn jabý týraly Jarlyqqa qol qoiǵanyma otyz jyl tolady. Sodan beri biz iadrolyq qarýǵa qarsy talmai kúres júrgizip kelemiz. Qazaqstan iadrolyq synaqtardyń aýyrtpalyǵyn basynan ótkergen el: memleketimizde bes júzden astam jarylys bolyp, kóp adam zardap shekti. Biz poligondy jabýmen qatar, kólemi jaǵynan dúnie júzindegi tórtinshi iadrolyq arsenaldan bas tarttyq. Men biyl Resei men AQSh arasyndaǵy Strategiialyq shabýyl qarýlaryn qysqartý jáne shekteý jónindegi kelisimniń uzartylǵanyna qýanyshtymyn. Osy jyly Iadrolyq qarýǵa tyiym salý sharty kúshine endi. Iadrolyq synaqtarǵa jappai tyiym salý týraly shartqa qol qoiyp, ratifikatsiialaǵan elderdiń qatary artyp keledi. Bul jumys jalǵasyn tabady dep úmittenemin, – dedi Qazaqstannyń Tuńǵysh Prezidenti.
Nursultan Nazarbaev Qazaqstannyń antiiadrolyq baǵyttaǵy kúsh-jigerin joǵary baǵalaǵany úshin rizashylyǵyn bildirdi.
– Biz iadrolyq qarýǵa qarsy kúreske jáne iadrolyq synaqtarǵa tyiym salýǵa arnalǵan barlyq is-sharaǵa atsalysyp kelemiz. Osy jumysty joǵary baǵalaǵandaryńyz úshin alǵysym zor. Bizdiń usynysymyz boiynsha Birikken Ulttar Uiymy 29 tamyzdy Halyqaralyq iadrolyq synaqtarǵa qarsy is-qimyl kúni dep jariialady, – dedi Nursultan Nazarbaev.
Óz kezeginde R.Floid iadrolyq qarýsyzdaný, iadrolyq qarýdy taratpaý, sondai-aq atom energiiasyn beibit maqsatta paidalaný isine zor úles qosqan kórnekti tulǵamen kezdesý múmkindigine ie bolǵany úshin alǵysyn bildirdi.
– Siz Iadrolyq synaqtarǵa jappai tyiym salý týraly shartty júzege asyrýǵa erekshe yqpal ettińiz. Sizdiń qosqan úlesińiz zor, onyń áseri de mol, – dedi Floid.
Kezdesýde taraptar halyqaralyq qaýipsizdik pen turaqtylyqty qamtamasyz etý salasyndaǵy qazirgi jaǵdai týraly pikir alysty.
