Búgin Úkimettiń keńeitilgen otyrysynda Elbasy Nursultan Nazarbaev protokoldy buzyp, ústeldiń tómen jaǵyna jaiǵasqan Qarjy ministrin joǵary otyrǵyzdy, dep habarlaidy "Ult aqparat".
«Salyq-biýdjet saiasatynda aýqymdy jumystar atqarylyp jatyr. Degenmen, kóleńkeli ekonomika kúres álsiz júrgizilip otyr. Máselen, bizdiń kedenshilerdiń import kórsetkishteri qytai tarapynyń málimetterinen birshama aiyrmashylyǵy bar. Mindet - aldaǵy úsh jylda kóleńkeli ekonomika kólemin keminde 40 paiyzǵa qysqartý», - dep atap ótken Elbasy osy máselege orai, Qarjy ministri Álihan Smaiylovty ornynan turǵyzdy. Alaida Qarjy ministriniń ústeldiń sońynda otyrýy Memleket basshysynyń ashýyn týǵyzdy.
«Baqytjan (Úkimet basshysy Saǵyntaev), Qarjy ministri ústeldiń sońynda emes, vitse-premerlerden keiin otyrýy tiis. Orny sol jerde. Ádette Qarjy ministri Premer-Ministrdiń orynbasary bolady. Al qarashy sen qaida otyrǵyzǵansyń? Protokoldy kim jasady? Men qazir protokoldy buzamyn», - degen Nursultan Nazarbaev Qarjy ministrin joǵary otyrýǵa shaqyrdy.
«Qojamjarovtan (Bas prokýror) bastap báriń bir orynǵa jyljyńdar», - dep buiyrdy Nursultan Nazarbaev.
Osydan keiin Qarjy ministri Úkimet basshysynyń orynbasary Erbolat Dosaev pen Qairat Qojamjarovtyń arasyndaǵy bosaǵan orynǵa keldi.
«Mine, onyń orny. Bul Qarjy ministri. Osyndai qarym-qatynasymyz bolǵandyqtan qarjy salamyz aqsap tur», - dedi Elbasy.
