Nazarbaev Túrkiia Respýblikasyna resmi saparynyń qorytyndysy boiynsha buqaralyq aqparat quraldarynyń ókilderi úshin brifing ótkizdi, dep habarlaidy "Ult aqparat" Aqordaǵa silteme jasap.
Buqaralyq aqparat quraldary ókilderiniń aldynda sóilegen sózinde Memleket basshysy qonaqjailyq kórsetkeni úshin Túrkiia Respýblikasynyń Prezidenti Rejep Erdoǵanǵa rizashylyq bildirip, ótken prezident sailaýyndaǵy jeńisimen quttyqtady.
Nursultan Nazarbaev Qazaqstan men Túrkiia arasyndaǵy qarym-qatynastardyń strategiialyq sipatyn atap ótti.
– Ortaq tarih pen rýhani qundylyqtarǵa negizdelgen qarym-qarynastarymyz qarqyndy damyp, barlyq baǵyttar boiynsha nyǵaia túsýde, – dedi Qazaqstan Prezidenti.
Memleket basshysy Túrkiia Respýblikasynyń Prezidenti Rejep Erdoǵanmen ótken kelissóz nátijelerine jan-jaqty toqtaldy.
– Búgin Túrkiia Prezidentimen mazmundy ári nátijeli kelissóz ótkizdik. Bul kezdesý ózekti máseleler jóninde pikir almasýǵa múmkindik berdi. Jalpy, Astana men Ankara óńirlik jáne halyqaralyq problemalardy árdaiym ashyq talqylaitynyn atap ótkim keledi. Bul máseleler boiynsha bizdiń ustanymdarymyz uqsas, – dedi Qazaqstan Prezidenti.
Sondai-aq, Nursultan Nazarbaev búgin ótken Qazaqstan men Túrkiia arasyndaǵy Joǵary deńgeidegi strategiialyq yntymaqtastyq keńesiniń úshinshi otyrysy eki jaqty qatynastarǵa odan ári tyń serpin beretinine senim bildirdi.
Memleket basshysy eki eldiń saiasi dialog pen baýyrlas halyqtardyń dostyǵyn ári qarai nyǵaityp, tereńdete túsýge múddeli ekenin aitty.
Sonymen qatar, Qazaqstan Prezidenti eki memleket arasyndaǵy saýda-ekonomikalyq jáne investitsiialyq yntymaqtastyq máselelerine toqtaldy.
– Qazir elimizde túrik kapitalynyń qatysýymen qurylǵan 1800-den astam kásiporyn bar. Taýar ainalymynyń kólemi ótken jyly shamamen 2 milliard dollar boldy. Bul kórsetkishti bolashaqta 5 milliard dollarǵa jetkizemiz dep kelistik, – dedi Nursultan Nazarbaev.
Nursultan Nazarbaev «Jańa sinergiia» atty birlesken baǵdarlamany júzege asyrýdyń aralyq qorytyndylaryn atap ótip, «túrik biznesiniń kapitandarymen» júrgizilgen kelissózderdiń nátijelerine toqtaldy.
– Jalpy, saparym barysynda quny 2 milliard dollarǵa jýyq kommertsiialyq jobalarǵa qatysty kelisimderge qol qoiyldy. Aldaǵy ýaqytta búgingi qol jetkizgen ýaǵdalastyqtardy júzege asyrý úshin kúsh jumyldyrýymyz qajet, – dedi Memleket basshysy.
Qazaqstan Prezidenti túrik investorlaryn Aqtaý jáne Quryq porttary negizinde jumys istep jatqan kólik-logistika habyn damytýǵa belsendi atsalysýǵa shaqyrdy.
– Búgingi kelissózder barysynda biz kólik-tranzit, munai-gaz, áskeri-tehnikalyq, aýyl sharýashylyǵy, týrizm, mádeniet, bilim, ǵylym jáne tehnologiia salalaryndaǵy yntymaqtastyǵymyzdy talqyladyq. Biz osy baǵyttar boiynsha ózara yqpaldastyǵymyzdy nyǵaitýǵa ýaǵdalastyq, – dedi Nursultan Nazarbaev.
R.Erdoǵan Qazaqstan Prezidentine resmi sapary úshin rizashylyq bildirip, ótken kezdesýlerdiń nátijesin joǵary baǵalady.
Túrkiia Respýblikasynyń Prezidenti saýda-ekonomikalyq bailanystardy keńeitý, bilim jáne mádeniet salalaryndaǵy yntymaqtastyqty tereńdetý máselelerine qatysty kelissózderdiń mańyzdy nátijelerine toqtalyp, onyń oń qarqynyn atap ótti.
