AQSh Prezidenti Donald Tramptyń álem ekonomikasynyń fragmenttelýine qarsy bolýy unaidy. Bul týraly Bloomberg agenttigine suhbat bergen QR Prezidenti Nursultan Nazarbaev aitty, dep habarlaidy "Ult aqparat" Feisbýktegi Aqordanyń baspasóz qyzmetine silteme jasap.
Suhbat barysynda Prezident agenttik tilshilerine: «Alystan oraǵytpai, 20-shy jyldan keiin de bilik basynda qalasyz ba?» dep tikelei suramaisyzdar ma» dei kele, bul saýalǵa birden jaýap berdi.
«Adamnyń ómir súrý uzaqtyǵy qansha ekendigin boljaý óte qiyn. Men uzaq ýaqyttan beri jumys istep kelemin, bul ózderińizge de málim. Sol úshin synǵa da ushyraimyn. Kóp jumys isteý kerek pe, az jumys isteý kerek pe? Barlyq másele seniń qanshalyqty tiimdi jumys isteýińde. Óz qyzmetińmen halqyńa, elińe paida ákelesiń be, ákelmeisiń be? Barlyq másele osynda dep sanaimyn. Eger de bizdiń zańymyz men Konstitýtsiiamyzǵa keler bolsaq, onda ol maǵan munan ary da kandidatýramdy usynýǵa ruqsat beredi. Biraq, 20-shy jyldan keiin ne bolaryn men sizderge aita almaimyn. Óitkeni, ol kóptegen faktorlarǵa bailanysty», - dedi Nazarbaev.
Sonymen qatar Elbasy AQSh-taǵy prezidenttik sailaýdyń qorytyndysyna da toqtaldy.
«Tramp myrzanyń usynystarynan maǵan ne unaidy? Maǵan onyń álem ekonomikasynyń fragmenttelýine qarsy bolýy unaidy. Qarańyzdarshy, taza saiasi turǵyda ne oryn alyp jatyr? Transtynyqmuhity yntymaqtastyǵy. Bul bir. Onda Amerika Qurama Shtattary bar. Transatlantikalyq týraly sóz boldy. Onda Amerika men Eýropa bar. Sonda ortasyndaǵy biz qaida qaldyq? Kartaǵa qarańyzdar, Resei, bizdiń barlyq óńir, Qytai, Úndistan, Pákistan anda da joq, munda da joq. Bul rette Shanhai yntymaqtastyq uiymy nemese Úlken Eýraziialyq birlestik aiasynda birigýge týra keledi», - dedi Memleket basshysy.
