Qazaqstan Prezidenti Nursultan Nazarbaev QR Ulttyq ǵylym akademiiasynyń 70 jyldyq mereitoiyna arnalǵan QR UǴA-nyń Jalpy jinalysynyń saltanatty sessiiasyna qatysyp, bolashaq qazaq azamaty qandai bolýy kerek degen suraqqa jaýap berdi, dep habarlaidy QazAqparat.
«Tomiris pen Shyńǵys han qazaq eken degende meniń ishim ashidy. Bizdiń basqa aitatyn sózimiz joq pa? Basymyzdy artqa buryp, aldyǵa qalai júremiz? Aldyǵa qaraityn kez keldi. Toni Blerdiń parlamentte aitqan sózi bar edi. «Ulybritaniianyń uly tarihy bar. Biraq biz murajailarda ómir súre almaimyz, adamdardy kompiýterge otyrǵyzatyn ýaqyt keldi» degen. Sol siiaqty biz de oilanýymyz kerek. Sizder, ǵalymdardan, dýaly aýyzdan shyǵatyn sóz bolýy kerek. Sondyqtan, jańa jaǵdaida Qazaqstannyń bolashaq urpaǵy qandai bolýy kerek degen saýal týyndaityny zańdy. Biz táýelsizdikke qol jetkizip, Uly Dala tósinde tuǵyrly memleket qurǵan aǵa býynbyz, osy otyrǵanda. Bizge osy kieli jetistikterimizdi baiandy etetin, bizdiń asqaq bolmysymyzdy eselei túsetin zerek te, ziiatker urpaq kerek. Ol qandai urpaq? Ol - rýhani álemi bai, táýelsizdiktiń kiesin pir tutatyn, dini men mádenietin qasterleitin densaýlyǵy myqty, óresi biik azamat. Sol azamatty daiyndaýymyz kerek. Ozyq tehnologiialar men ǵylymnyń bilgiri atanǵan jahandyq deńgeidegi maman bolyp, ár jerde jumys istei alatyn bolýy kerek. Ol úshin ana tilimen birge aǵylshyn tilin igerý kerek. Sonda ǵana qazaqtyń azamaty dúniejúzilik básekege qabiletti bolady» , - dedi QR Prezidenti.
Aita keteiik, búgin, 22 aqpan kúni Abai atyndaǵy Qazaq memlekettik akademiialyq opera jáne balet teatry ǵimaratynda QR Prezidenti, QR UǴA akademigi Nursultan Nazarbaevtyń qatysýymen akademiianyń 70 jyldyq mereitoiyna arnalǵan Jalpy jinalystyń saltanatty sessiiasy ótti.
