Nursultan Nazarbaev Túrkitildes memleketter yntymaqtastyǵy keńesine múshe elderdiń basshylarynyń 7-shi sammitine qatysty, dep habarlaidy "Ult aqparat" Elbasy.kz aqparat kózine silteme jasap.
Nursultan Nazarbaev sammitte Prezident Shavkat Mirziioevti jáne búkil ózbek halqyn Túrki keńesine tolyqqandy múshe bolýymen quttyqtady.
– Keńestiń quramyna Ózbekstannyń múshe bolýy – búkil túrki tildes qaýymdastyq úshin tarihi ári kópten kútken oqiǵa, – dedi Elbasy.
Sonymen qatar, Nursultan Nazarbaev Býdapeshtte Túrki keńesiniń ókildigin ashý - yntymaqtastyqtyń Eýropa vektoryn damytýda erekshe mańyzdy ekenin atap ótti.
Sondai-aq, Elbasy Qyrǵyz Respýblikasynyń Túrki keńesine tóraǵa qyzmetindegi jumysyn joǵary baǵalady.
– Maǵan «Túrki Keńesiniń Qurmetti Tóraǵasy» mártebesin berý týraly usynysy úshin Prezident Rejep Erdoǵanǵa alǵys bildiremin. Osy bastamany qoldaǵandaryńyz úshin barshańyzǵa rizamyn. Bul joǵary mártebe maǵan ortaq uiymymyzdyń jumysyna odan ári belsendi qatysýǵa múmkindik beredi, – dedi Qazaqstannyń Tuńǵysh Prezidenti.
Eske sala ketsek, búgin Ázerbaijan astanasynda Túrkitildes memleketter yntymaqtastyq keńesine múshe memleketter basshylarynyń 7-shi sammiti ótti.
Sharaǵa TMYK elderiniń basshylary - Túrkiia Prezidenti Rejep Erdoǵan, Ázerbaijan Prezidenti Ilham Áliev, Qyrǵyzstan Prezidenti Sooronbai Jeenbekov, sondai-aq Qazaqstannyń Tuńǵysh Prezidenti - Elbasy Nursultan Nazarbaev qatysty.
Biyl Qazaqstan, Túrkiia, Ázerbaijan jáne Qyrǵyzstan prezidentteri qol qoiǵan tarihi qujat – Nahchyvan deklaratsiiasyna týra 10 jyl tolyp otyr. 2009 jyly Ázerbaijannyń Nahchyvan qalasynda ótken Túrkitildes memleketter basshylarynyń IX sammitinde Nahchyvan deklaratsiiasyna qol qoiyldy. Osylaisha, Qazaqstannyń Tuńǵysh Prezidenti Nursultan Nazarbaevtyń Túrki keńesin qurý ideiasy iske asqan edi.
