Memleket basshysy Tájikstan Respýblikasynyń Prezidenti Emomali Rahmonmen keńeitilgen quramda kelissóz júrgizdi, dep habarlaidy "Ult aqparat" Aqordaǵa silteme jasap.
Nursultan Nazarbaev bul sapardyń Qazaqstan men Tájikstan arasyndaǵy diplomatiialyq qatynastardyń 25 jyldyǵyna tuspa-tus kelýiniń simvoldyq máni bar ekenin atap ótti.
– Biz Qazaqstanǵa, jas elordamyz – Astanaǵa kelgenderińiz úshin rizashylyq bildiremiz. Búgingi kezdesýimizdiń ekijaqty qatynastar jylnamasyndaǵy mańyzy erekshe, – dedi Qazaqstan Prezidenti.
Memleket basshysy Tájikstan Qazaqstannyń mańyzdy strategiialyq áriptesi bolyp sanalatynyn airyqsha atap ótip, osy jyldar ishinde eki el arasynda tatý kórshilik ári senimdi qarym-qatynas ornaǵanyn aitty.
– Biz óńirlik jáne jahandyq deńgeide ózara yqpaldasyp kelemiz. Aramyzda 80-nen astam sharttar men kelisimderdi qamtityn aýqymdy quqyqtyq baza qalyptasqan, – dedi Qazaqstan Prezidenti.
Nursultan Nazarbaev ekijaqty qarym-qatynastardy odan ári nyǵaitýǵa baǵyttalǵan, búgin qol qoiylatyn kelisimderdiń mańyzdylyǵyn atap ótti.
– Qarym-qatynasymyzdyń 25 jyly – dostyqtyń jáne bir-birimizge qoldaý kórsetýimizdiń tarihy. Búgin biz negizgi qujatqa qol qoiamyz. Bul – bizdiń ortaq jumysymyzdy qorytyndylap, keleshektegi basymdyqtarymyzdy aiqyndaityn birlesken málimdeme, – dedi Memleket basshysy.
Emomali Rahmon Nursultan Nazarbaevqa joǵary marapat – «Parasat» ordenin tabys etkeni úshin alǵys aityp, Qazaqstan men Tájikstan arasyndaǵy qarym-qatynasty nyǵaitýǵa qosqan úlesin joǵary baǵalaǵanyna shynaiy rizashylyǵyn bildirdi.
– Qazaqstanmen aradaǵy qarym-qatynas Tájikstannyń syrtqy saiasatynda jetekshi oryn alady. Biz ony qarqyndy túrde damytýǵa niettimiz. Tájikstan halqy da jáne jeke ózim de halqymyzdyń basyna qiyn kún týǵanda qoldaý bildirip, ekonomikalyq turǵydan kómek kórsetkenderińizdi eshqashan umytpaimyz, – dedi Tájikstan Respýblikasynyń Prezidenti.
Sońynda E.Rahmon senimdi saiasi platforma men myqty quqyqtyq bazaǵa negizdelgen ekijaqty yntymaqtastyqtyń tabysty damyp kele jatqanyn atap ótti.
