Búgin Respýblikalyq jastar forýmynda Elbasy Nursultan Nazarbaev Táýelsizdiktiń eleń-alańynda Parlamentti ne úshin birneshe márte taratyp jibergenin túsindirdi, dep habarlaidy Ult.kz tilshisi QazAqparat agenttigine silteme jasap.
«Qazir bul zal osy jerge jinalǵan 1,5 myń jas qazaqstandyqtyń pozitivti energiiasyna toly. Sizder táýelsizdik qurdasysyńdar. Sizder ákeleriń men analaryń ómir súrgen burynǵy keńestik júie jaiynda jáne Qazaqstannyń damý bastaýyndaǵy qiyndyqtardan eshteńe bilmeisizder. Sizder basqa ómirdi bilmeisizder. Biraq, táýelsizdiktiń tek bizge ǵana emes, barlyq halyqtar úshin ońai kelmeitindigin, úlken qiyndyqtarmen keletindigin bilýge tiissizder», - dep atap ótti Elbasy.
Memleket basshysy elimizdiń egemendiginiń qiyn-qystaý kezeńinde infliatsiia órship, jumyssyzdyq beleń alǵandyǵyn, kásiporyndar toqyrap, zeinetaqy, jalaqy bolmaǵandyǵyn basa aitty. El damýynyń eleń-alańyndaǵy qiyndyqtar jaiynda da sóz qozǵady.
«Barlyq jaýapkershilikti óz moinyma alýǵa týra keldi jáne eski júie boiynsha sailanǵan Parlament jańa reformalar júrgizýge qarsylyq tanytty. Olardy aiyptaýǵa da bolmady. Olar ózge formatsiianyń adamdary edi. Jekeshelendirý, naryq, erkin ekonomika jáne saiasat syndy sózder túsiniksiz boldy ári olar qoldamady. Mine, sol bir býyrqanǵan jyldary biliktiń kúrdeli teketiresi jaǵdaiynda Parlamentti birneshe márte taratýǵa jáne barlyq jaýapkershilikti óz moinyma alyp, 5 aidyń ishinde zańdy kúshi bar 147 zań, prezident Jarlyǵyn daiyndap shyǵarýǵa týra keldi. Dál osy jait Qazaqstannyń basqa postkeńestik elderge qaraǵanda birneshe qatar alǵa jyljýyna septigin tigizdi», - dedi Nazarbaev.
