Qazaqstannyń Tuńǵysh Prezidenti «El úmiti» jáne «Qamqorlyq» bastamalarynyń «Táýelsizdik jolyn jalǵastyrar urpaq» atty forýmyna qatysty. Bul týraly elbasy.kz saity habarlady.
Forýmda «El úmiti» bastamasynyń jeńimpazdaryn marapattaý rásimi ótip, Nur-Sultan men Almaty qalalarynda, Atyraý, Batys Qazaqstan, Jambyl, Qostanai, Túrkistan jáne Shyǵys Qazaqstan oblystarynda ońaltý ortalyqtary ashyldy.
Jiynda sóz sóilegen Elbasy táýelsizdiktiń alǵashqy jyldarynan bastap memleket árdaiym básekege qabiletti jastardy tárbieleýge erekshe mán berip kele jatqanyn atap ótti.
– Jastar jylynyń aiasynda daryndy balalardy qoldaý úshin «El úmiti» bastamasyn usynǵan edim. Sonymen qatar taǵy bir mańyzdy bastamany – «Qamqorlyq» jobasyn júzege asyrýǵa kiristik. Búgin biz osy bastamalardyń nátijelerimen tanystyq, – dedi Nursultan Nazarbaev.
Qazaqstannyń Tuńǵysh Prezidenti qarqyndy ári mańyzdy ózgerister jaǵdaiynda qoǵam úshin eń mańyzdy mindet eldiń odan ári damýyna negiz qalyptastyrý ekenin aitty.
«Qazaqstan jastary jahandyq ózgeristerdiń alǵy shebinen kórinýge tiis. Intellektýaldyq áleýeti zor dál osy jastar batyl ideialar men bastamalardy iske asyrýǵa jol bastaidy», – dedi Elbasy.
Nursultan Nazarbaev «El úmiti» jobasy intellektýaldy jáne shyǵarmashylyq damý, ulttyq mádeniet pen dástúrlerdi taný jáne muqtaj jandarǵa kómek kórsetý jolynda eldiń belsendi jastarynyń basyn biriktirgenin atap ótti.
Sondai-aq Qazaqstannyń Tuńǵysh Prezidenti «Myń Bala» ulttyq olimpiadasynyń nátijeleri men ózgeristerdi qadaǵalaý boiynsha sala menedjerlerin oqytý baǵdarlamasynyń júzege asyrylý barysyna toqtaldy.
Sonymen qatar Elbasy «Qamqorlyq» bastamasyn júzege asyrýdyń mańyzdylyǵyna toqtaldy.
«Búgin aýrýhanalar janynan ońaltý ortalyqtarynyń jáne eldiń segiz óńirindegi mektepter janynan inkliýzivti qoldaý kabinetteriniń ashylýy eń jaqsy qural-jabdyqtardy qoldana otyryp, jyl saiyn bes myń bala úshin álemdik ádister boiynsha aqysyz keshendi ońaltýdy qamtamasyz etýge múmkindik beredi», – dedi Nursultan Nazarbaev.
Qazaqstannyń Tuńǵysh Prezidenti «Qamqorlyq» ortalyqtarynyń modeli qoljetimdi ońaltý isin damytýdyń jaqsy úlgisi ekenin atap ótti.
«Bul bastamany qoldaǵany úshin «Samuryq-Qazyna» ulttyq ál-aýqat qoryna, Úkimetke jáne ákimdikterge alǵysymdy bildiremin. Sonymen qatar 2021 jyly óńirlerde taǵy jeti ortalyqtyń ashylýyna jáne Almaty qalasynda eki ortalyqtyń qaita qurylýyna qoldaý kórsetýlerińizdi suraimyn. Sondai-aq men barlyq óńirlerdi ár aýdanda osyndai ortalyqtar ashýǵa jáne burynǵylaryn jańartýǵa shaqyramyn. Osy arqyly biz múmkindigi shekteýli balalardy jáne olardyń otbasylaryn qoldaý aiasyn keńeitemiz», – dedi Elbasy.
Sońynda Nursultan Nazarbaev jastardy Qazaqstannyń damýyna óz úlesterin qosýǵa shaqyrdy, sondai-aq forýmǵa qatysýshylardyń barlyǵyn kele jatqan Táýelsizdik kúnimen quttyqtady.
.jpeg)