Elbasy Energetika ministri Qanat Bozymbaevty qabyldady, - dep habarlaidy "Ult aqparat" Aqordaǵa silteme jasap.
Kezdesýde Memleket basshysyna janar-jaǵarmai naryǵyndaǵy qazirgi ahýal men munai óńdeý zaýyttaryn jańǵyrtý barysy jóninde málimdeldi.
Nursultan Nazarbaev elimizdegi janarmai tapshylyǵy Qazaqstan Úkimeti men Energetika ministrligi tarapynan naryqty janar-jaǵarmaimen qamtamasyz etý úshin ýaqtyly sheshim qabyldamaýy saldarynan oryn alyp otyrǵanyn aitty.
– Energetika ministrligi elimizdiń otyn-energetika máselelerine, sonyń ishinde ishki naryqty janar-jaǵarmaimen qamtamasyz etýge jaýapty. Elimizde onyń tapshylyǵyna bailanysty oryn alǵan ahýal Úkimet pen Energetika ministrligi tarapynan nemqurailylyq pen jaýapsyzdyqqa jol berilgenin kórsetip otyr. Siz biylǵy mamyr aiynda munai óńdeý zaýyttaryna jóndeý jumystaryn júrgizý kestesin bekittińiz. Kúzde úsh zaýyttyń ekeýi jóndeý úshin toqtatylatynyn bildińiz. Mundai jaǵdai jyl saiyn qaitalanyp keledi. Sony bile tura, aldyn-ala daiyndalyp, halyqty qamtamasyz etý úshin qajetti kólemde janar-jaǵarmai jetkizýge tiis edińiz. Olai bolmady, – dedi Qazaqstan Prezidenti.
Sondai-aq, Elbasy ministrliktiń janar-jaǵarmai naryǵyndaǵy ahýaldy turaqtandyrýǵa baǵyttalǵan buǵan deiingi sharalarynyń tiimdiligi tómen bolǵanyn atap ótti.
– Siz usynǵan jaqsy bastamalar az emes. Olar meniń tarapymnan da, Úkimet tarapynan da qoldaý taýyp keledi. Janarmai tapshylyǵyn boldyrmaý úshin baǵany memlekettik retteýden bas tartý usynyldy. Alaida, naryqta taǵy da janar-jaǵarmai jetispeýshiligi oryn aldy. Osyǵan bailanysty, Úkimettiń usynysy boiynsha sizge sógis jariialadym. Bul – qyzmetten bosatylǵanmen birdei, – dedi Memleket basshysy.
Sondai-aq Qanat Bozymbaev Qazaqstan Prezidentine Pavlodar jáne Atyraý munai óńdeý zaýyttaryn jańǵyrtý jumystarynyń barysy týraly málimdedi.
– Eki munai óńdeý zaýytyn jetildirip, jańǵyrtý biyl aiaqtalady. Qarasha aiynda Pavlodardaǵy zaýytty iske qosý josparlanyp otyr. Atyraýdaǵy munai óńdeý zaýytyndaǵy jumystardy osy jyldyń 16 jeltoqsanyna deiin aiaqtaý kózdelgen. Munda munai ónimderiniń kólemin arttyrýǵa jáne olardyń sapasyn jaqsartýǵa múmkindik beretin katalitikalyq kreking qurylǵysy birinshi ret paidalanylatyn bolady.
Q.Bozymbaev Memleket basshysyna Shymkenttegi munai óńdeý zaýytynda da joǵary oktandy benzin shyǵarýǵa arnalǵan katalitikalyq kreking qurylǵysyn salý josparlanyp otyrǵany týraly málimdedi.
Energetika ministri kelesi jyly Qazaqstan naryǵy joǵary sapaly janarmaimen, sonyń ishinde aviatsiialyq janarmaimen qamtamasyz etiletinin aitty.
Sońynda Qazaqstan Prezidenti naryqty janar-jaǵarmaimen qamtamasyz etý úshin jaýapkershilik júkteletinin taǵy da eskertip, janarmai tapshylyǵyn boldyrmaý úshin barlyq qajetti sharalar qabyldaýdy tapsyrdy.
