Nursultan Nazarbaev Sybailas jemqorlyqqa qarsy is-qimyl agenttiginiń tóraǵasy Alik Shpekbaevpen kezdesti, dep habarlaidy Elbasynyń resmi saity.
Qazaqstannyń Tuńǵysh Prezidenti agenttiktiń tiimdiligin arttyrý aiasynda sybailas jemqorlyqqa qarsy kúreste halyqaralyq tájiribeni qoldanýdyń mańyzdylyǵyn atap ótti.
- Biz sybailas jemqorlyqqa qarsy júieni jetildirý úshin barlyq qajetti sharalardy qabyldadyq. Alaida, shet elderdiń tájiribesin zertteýdi jalǵastyryp, qylmystyń osy túrimen kúresýdiń ozyq tájiribelerin engizýimiz kerek, - dedi Nursultan Nazarbaev.
Sonymen qatar, Elbasy qoǵamnyń sybailas jemqorlyqqa qarsy is-qimyl protsesine qatysýy qajettigine nazar aýdardy.
- Halyq sybailas jemqorlyqpen belsendi kúresýi qajet. Zań buzylǵan jaǵdaida azamattar ýaqtyly habarlaýǵa tiis, al memleket belsendi azamattardy qoldaýy kerek, - dedi Elbasy.
Kezdesý barysynda A.Shpekbaev Nursultan Nazarbaevqa ortalyq memlekettik organdarmen jáne oblys ákimdikterimen birlesip «Adaldyq alańy» jobasyn iske asyrý barysy týraly baiandady.
