Búginde 70 myń qazaqstandyq jas azamat shetelde bilim alyp jatyr. Olar keledi eline, qazaq basqa jerde tura almaidy. Bul jóninde Memleket basshysy «Jańa gýmanitarlyq bilim. Qazaq tilindegi 100 jańa oqýlyq» jobasy boiynsha qazaq tiline aýdarylǵan 18 kitaptyń saltanatty tusaýkeser sharasynda málimdedi, dep habarlaidy Baq.kz tilshisi.
«Jańa dáýirdiń eń basty qajettiligi kemel bilim bolyp otyr. Bilimi damyǵan el ǵana órkendeidi, basqasy artta qalady. Sondyqtan, táýelsizdiktiń birinshi kúninen bastap, qarajat joq kezde, zeinetaqy men jalaqyny tólemei jatqan kezde jastardy qyrýar aqsha tólep, shetelge nege jiberdim? Qazir ata-analar da jiberip jatyr, búginde sheteldegi neshe túrli ýniversitetterde 70 myń qazaq balasy oqyp jatyr. Keledi eline báribir. Qansha aitqanmen, qazaq basqa jerde tura almaidy», - dep senim bildirdi Elbasy.
Nazarbaev el jastarynyń «Bolashaq» baǵdarlamasy boiynsha sheteldik oqý oryndarynda bilim alýy úshin memleket tarapynan qomaqty qarajat bólinip jatqanyn da eske saldy.
«Sol «Bolashaq» arqyly bitirip kelgen qyz-jigitter qazir ár salada jumys istep jatyr. Oǵan memleketten qarajat kóp shyǵady. Onyń qanshalyqty tiimdi ekenin de biz tekserip jatqan joqpyz. Onyń ústine, oqyp kelgenderdiń ishinde barlyǵynyń bilim sapasy 100 protsent jaqsy dep aitýǵa bolmaidy. Sondyqtan, elimizdegi jańadan qurylǵan ýniversitet eshbir dúniejúzilik ýniversitetten kem emes. Men oǵan óz atymdy qoiýǵa ruqsat berdim, basqaǵa ylǵi qarsy bolatynmyn, sebebi, bul bilim degen másele, oǵan memlekettiń barlyǵy kóńil aýdarsyn dedim. Bizdiń ziiatkerlik mektepterimiz, oǵan qosylatyn «Miras» qazir dúniejúzilik sertifikat aldy. Endi, ol mektep órenderi bitirgen baǵasymen árbir ýniversitetke oqýǵa túse alady. Ekinshiden, bizdiń ýniversitetterge abitýrientter daiyndaidy. Keremet qoi», - dep tamsandy Memleket basshysy.
