Qazaqstannyń Tuńǵysh Prezidenti Nursultan Nazarbaev tóraǵalyq etken Qaýipsizdik Keńesiniń otyrysy ótti, - dep habarlaidy "Ult aqparat" Elbasy.kz saityna silteme jasap.
Otyrys barysynda Qarýly Kúshterdi, basqa da áskerler men áskeri quralymdardy 2030 jylǵa deiin qurý jáne damytý tujyrymdamasynyń jobasy qaraldy, sondai-aq shekaralyq qaýipsizdikti qamtamasyz etý máseleleri talqylandy.
Otyrysty ashqan Qaýipsizdik Keńesiniń tóraǵasy, eń aldymen, koronavirýs infektsiiasynyń jahandyq pandemiiasynyń áleýmettik-ekonomikalyq saldarymen bailanysty el damýynyń kúrdeli syrtqy jaǵdailaryn atap ótti. Osyǵan bailanysty vaktsinatsiia jumystarynyń mańyzdylyǵy, sondai-aq Úkimettiń halyqtyń áleýmettik máselelerin sheshý jáne ekonomikalyq ósý qarqynyn saqtaý qajettiligi atap ótildi.
Nursultan Nazarbaev áskeri qurylymda jáne Qarýly Kúshterdiń qazirgi zamanǵy jaǵdaida konfigýratsiiasynda jańa tásilder ázirleý qajet ekenin atap ótti.
"Biz barlyq kórshimizben berik dostyq qarym-qatynas jáne jetekshi derjavalarmen berik áriptestik ornattyq. Myqty armiia - el qaýipsizdiginiń mańyzdy kepili", - dedi Qaýipsizdik Keńesiniń tóraǵasy.
Elbasy búginde asimmetriialyq jáne gibridti qaterlerdi toitarýǵa daiyndyq, jańa tehnologiialardy engizý jáne áskeri protsesterdi basqarýdy avtomattandyrý mańyzdy mánge ie ekenin aitty.
"Bizdiń Qarýly Kúshterimiz egemendik pen aýmaqtyq tutastyqty qorǵaýǵa, ulttyq múddelerdi qorǵaýǵa qabiletti bolýy kerek. Osynyń bári taiaýdaǵy onjyldyqta armiianyń damýyn josparlaý kezinde eskerilýge tiis", - dep tapsyrdy Nursultan Nazarbaev.
Qaýipsizdik Keńesiniń tóraǵasy shekara qaýipsizdigin qamtamasyz etý mindetin sheshý Shekara qyzmetiniń jumysyn jáne shekarany qorǵaý ádisterin jetildirýdi ǵana emes, sondai-aq ekonomikalyq, aqparattyq, qoǵamdyq jáne áskeri qaýipsizdik baǵyttaryna bailanysty júieli sharalardy talap etetinin atap ótti.
"Shekarany qaýip-qaterdiń barlyq túrinen senimdi qorǵaýdy qamtamasyz etý qajet. Shekara qyzmeti men Qarýly Kúshterdiń qurylysy úndestirilýge jáne biryńǵai standarttar boiynsha júrgizilýge tiis. Sonymen birge, biz shekara qaýipsizdigi máselesin keshendi, júieli túrde qaraýymyz kerek", - dedi Nursultan Nazarbaev.
