Memleket basshysy Saýd Arabiiasy Koroldiginiń Parsy-arab shyǵanaǵy isteri jónindegi memlekettik ministri Samer Ál-Sabhanmen kezdesti, - dep habarlaidy "Ult aqparat" Aqordaǵa silteme jasap.
Kezdesý barysynda taraptar eki el yntymaqtastyǵynyń qazirgi ahýaly men perspektivalaryn talqylady.
Qazaqstan Prezidenti byltyr kúzde Saýd Arabiiasy Koroldigine barǵan resmi saparynyń qorytyndysynda qol jetkizilgen mańyzdy nátijelerge nazar aýdardy.
Nursultan Nazarbaev sońǵy 25 jylda Qazaqstan men Saýd Arabiiasy arasyndaǵy qarym-qatynas qarqyndy damyp, tájiribe almasý jolǵa qoiylǵanyn, sondai-aq keń aýqymdy máseleler jóninde ýaǵdalastyqtarǵa qol jetkizilgenin atap ótti.
Memleket basshysy elderimizdiń arasyndaǵy yntymaqtastyqty nyǵaitý úshin Qazaqstan aldaǵy ýaqytta da bar kúsh-jigerin jumsaitynyn aitty.
Sonymen qatar, taraptar kún tártibindegi mańyzdy jaittardy, sonyń ishinde óńirlik qaýipsizdik, konfessiiaaralyq qaqtyǵystardy sheshý máselelerin talqylady.
– Ózińizge málim, jaqynda Astanada Siriiadaǵy qaqtyǵystar jóninde kezekti kelissóz ótti. Bul kezdesýge Siriia oppozitsiiasynyń barlyq ókili qatysqanyn atap ótken jón, – dedi Nursultan Nazarbaev.
Samer Ál-Sabhan Qazaqstan Prezidentine ekijaqty yntymaqtastyq máselelerin talqylaýǵa múmkindik týǵyzǵany úshin alǵys aityp, Saýd Arabiiasy Koroliniń sálemin jetkizdi.
– Biz Qazaqstanǵa islam álemine qatysty máselelerdi sheshýge qosqan úlesi, sonyń ishinde Siriiadaǵy qantógisti toqtatýǵa degen umtylysy úshin rizashylyq bildiremiz. Saýd Arabiiasy Koroldigi Siriiadaǵy qaqtyǵystar saiasi retteý arqyly sheshilýge tiis dep sanaidy. Biz bul máseleni tek beibit jolmen sheshý jónindegi Sizdiń ustanymyńyzdy qoldaimyz, – dedi Samer Ál-Sabhan.
Sondai-aq, kezdesýge Qazaqstan Prezidentiniń kómekshisi N.Onjanov, Syrtqy ister ministri Q.Ábdirahmanov jáne Saýd Arabiiasy Koroldiginiń Qazaqstandaǵy elshisi Zahir ben Mýtish Ál-Enazi qatysty.
