Nursultan Nazarbaev Premer-Ministr Baqytjan Saǵyntaevty qabyldady, dep habarlaidy "Ult aqparat" Aqordaǵa silteme jasap.
Memleket basshysy kezdesý barysynda Úkimettiń jyl basynan beri atqaryp jatqan jumystarynyń nátijelerine toqtalyp, ekonomikanyń túrli sektoryndaǵy memlekettik jáne salalyq baǵdarlamalardy odan ári sapaly iske asyrýdyń mańyzdylyǵyna nazar aýdardy.
– Jyl aiaqtalyp keledi. Osy ýaqyt ishinde kóp jumys atqaryldy. Biz EKSPO kórmesin, Islam yntymaqtastyǵy uiymynyń ǵylym jáne tehnologiialar jónindegi sammitin ótkizdik. Basqa da salalardaǵy jobalardy júzege asyryp jatyrmyz. Jalpy, ekonomikamyz turaqty damyp keledi, – dedi Elbasy.
Baqytjan Saǵyntaev Qazaqstan Prezidentine biylǵy 10 aidaǵy áleýmettik-ekonomikalyq damýdyń qorytyndylary jóninde baiandap, birneshe kórsetkishter men indikatorlar boiynsha oń ózgeris bar ekenin atap ótti.
– Biylǵy 10 aidyń qorytyndysy boiynsha ishki jalpy ónim 4 paiyzǵa ósti. Barlyq 6 sala boiynsha qysqa merzimdi ekonomikalyq indikatorlardyń oń ósimi baiqalýda. Sondai-aq, jyl sońyna deiin elimizdiń kólik-tranzittik áleýetin arttyrýǵa baǵyttalǵan jobalardy iske asyrý arqyly jaqsy nátijege qol jetkizemiz degen oidamyz, – dedi Premer-Ministr.
Budan bólek, Baqytjan Saǵyntaev Nursultan Nazarbaevty jalpy kapitalǵa salynǵan investitsiia kólemi 6,5 paiyzǵa óskeni jóninde habardar etti. Premer-Ministr bul indikator boiynsha negizgi ósim el ekonomikasyna tartylǵan jeke investitsiialar kóleminiń artýy esebinen bolyp otyrǵanyn aitty.
Sońynda Memleket basshysy birqatar naqty tapsyrma berdi.
