Elbasy Qazaqstan Respýblikasynyń Premer-Ministri Baqytjan Saǵyntaevty qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysyna «Qazaqstannyń úshinshi jańǵyrýy: jahandyq básekege qabilettilik» atty joldaýdy iske asyrý baǵytynda Úkimettiń atqaryp jatqan jumysy týraly esep berildi, sondai-aq 2017 jylǵy birinshi toqsannyń qorytyndysy boiynsha memlekettik jáne salalyq baǵdarlamalardyń oryndalýy jóninde málimet usynyldy.
Nursultan Nazarbaev buǵan deiin bekitilgen damý baǵdarlamalaryn iske asyrýdyń mańyzdylyǵyn, olardyń oryndalýyna sapaly baqylaý jasaý qajet ekenin atap ótti.
– Birinshi toqsannyń qorytyndysy boiynsha elimizdiń ekonomikasy 3%-ǵa ósti. Bul – baǵdarlamalarymyzdyń júzege asyrylý nátijesi. Osy baǵyttaǵy jumystardy jalǵastyrý qajet jáne jyl sońyna deiin kórsetkishterdi arttyryp, olardy tiimdi deńgeide saqtap qalý kerek. Buǵan qajetti alǵysharttar bar, – dedi Qazaqstan Prezidenti.
Sondai-aq, Elbasy aldaǵy is-sharalar jaiyna toqtalyp, olardy oidaǵydai ótkizý úshin jan-jaqty daiyndyq pen baqylaý júrgizý qajet ekenin aitty.
– Taiaýda Qazaqstanǵa Túrikmenstan basshylyǵynyń saparmen kelýi josparlanýda. Aldymyzda Astanada ótetin Shanhai yntymaqtastyq uiymynyń sammiti, «EKSPO-2017» halyqaralyq kórmesi bar. Sonymen qatar, elimizdiń odan ári damýynyń basty maqsattary týraly da umytpaý kerek, – dedi Memleket basshysy.
Budan bólek, Nursultan Nazarbaev «Bolashaqqa baǵdar: rýhani jańǵyrý» atty baǵdarlamalyq maqalada qoiylǵan mindetterdi iske asyrýdyń mańyzdylyǵyn atap ótti.
Qazaqstan Prezidenti aldaǵy jumystar aiasynda Úkimetke júktelgen jaýapkershiliktiń joǵary ekenine toqtalyp, bul úderiske jurtshylyqty, sonyń ishinde ziialy qaýym, jastar, úkimettik emes sektor ókilderin tartý qajet ekenin aitty.
– «Bolashaqqa baǵdar: rýhani jańǵyrý» atty maqala kóp jyldan beri oida júrgen bolatyn. Qazirgi ýaqytta maqalada qoiylǵan mindetterdi naqty iske asyrý jónindegi jospar ázirlenýde. Qarajat qajet etetin jobalar da bar. Alaida, olardyń kóbi respýblikalyq biýdjetten qosymsha qarjy bólýdi qajet etpeidi, – dedi Elbasy.
Memleket basshysy kóptegen qazaqstandyqtardyń aitylǵan bastamalardy qyzý qoldap otyrǵanyna nazar aýdardy.
– Kún saiyn maǵan elimizdiń ár óńirindegi jurtshylyq ókilderinen maqaladaǵy usynylǵan sheshimderge qoldaý bildirgen kóptegen jedelhattar kelip jatyr. Olardyń qatarynda túrli shyǵarmashylyq ujymdar, ziialy qaýym ókilderi jáne jastar da bar, – dedi Nursultan Nazarbaev.
Qazaqstan Prezidenti rýhani jańǵyrýdyń belgilengen baǵyttary boiynsha júrgiziletin jumystar joǵary sapaly deńgeide oryndalýǵa tiis ekenin atap ótti.
B.Saǵyntaev Elbasyǵa birinshi toqsannyń qorytyndysy boiynsha qysqa merzimdi ekonomikalyq kórsetkishterdiń ósip kele jatqany týraly baiandady. Premer-Ministrdiń málimetine sáikes, ónerkásiptiń taý-ken salasyndaǵy jáne qaita óńdeý sektorlaryndaǵy kórsetkishter joǵary deńgeige jetti.
Sondai-aq, B.Saǵyntaev Memleket basshysyna Úkimet ákimdiktermen, iri holdingtermen jáne kompaniialarmen birlesip qolǵa alǵan tehnologiialyq jańǵyrý jónindegi jol qartasynyń ázirlený barysy týraly málimdedi.
Kezdesý sońynda Nursultan Nazarbaev birqatar naqty tapsyrma berdi.
