Memleket basshysy Nursultan Ábishuly Resei Federatsiiasynyń Prezidenti Vladimir Pýtinge quttyqtaý jedelhatyn joldady, dep habarlaidy "Ult aqparat" Aqordaǵa silteme jasap.
Nursultan Nazarbaev Vladimir Pýtindi Qazaqstan Respýblikasy men Resei Federatsiiasy arasyndaǵy diplomatiialyq qarym-qatynastyń ornaǵanyna 25 jyl tolýymen quttyqtady.
«Bizdiń memleketaralyq qarym-qatynastarymyz 2013 jylǵy 11 qarashadaǵy HHI ǵasyrdaǵy tatý kórshilestik pen odaqtastyq týraly ekijaqty sharttyń aiasynda jáne sonyń erejelerine sai damyp kele jatqany qýantady.
Elderimiz arasyndaǵy Eýraziialyq ekonomikalyq odaq, Ujymdyq qaýipsizdik shart uiymy, TMD, ShYU, BUU jáne basqa da kópjaqty qurylymdar aiasyndaǵy yntymaqtastyq Astana men Máskeýdiń senim men ózara túsinistikke negizdelgen strategiialyq áriptestigin damytýdyń mańyzdy bóligi bolyp sanalady.
Men aramyzda qalyptasqan shynaiy jeke qarym-qatynasty da joǵary baǵalaimyn. Bul rette, yntymaqtastyǵymyzdy odan ári nyǵaitý baǵyty halyqtarymyz tarapynan keńinen qoldaý taýyp otyrǵany mańyzdy», – delingen jedelhatta.
Sońynda Qazaqstan Prezidenti Resei Prezidentine zor densaýlyq, alǵa qoiǵan josparlaryn júzege asyrý jolynda tolaǵai tabys tilep, dostas Resei halqynyń odan ári ósip-órkendeýine niettestik bildirdi.
