Elbasy temirjol salasy men munai-gaz kesheni qural-jabdyqtaryn shyǵaratyn zaýytqa bardy, dep habarlaidy "Ult aqparat" Aqordaǵa silteme jasap.
Qazaqstan Prezidenti Petropavl qalasyna kelgen soń, temir jol avtomatikasy, telemehanika, bailanys, qaýipsizdik júiesi qurylǵylaryn jáne munai-gaz kesheni kásiporyndaryna arnalǵan qural-jabdyqtar shyǵarýǵa mamandanǵan zaýytty aralap kórdi.
Memleket basshysy Soltústik Qazaqstan oblysynyń ákimi Q.Aqsaqalovtyń óńirdegi áleýmettik-ekonomikalyq ahýaldyń damýy, indýstriialyq jobalardyń iske asyrylýy jáne joldaý aiasyndaǵy tapsyrmalardyń oryndalýy jónindegi esebin tyńdady.
Nursultan Nazarbaev oblys ákiminiń baiandamasynan keiin Qazaqstan Respýblikasy men Resei Federatsiiasynyń óńiraralyq yntymaqtastyǵynyń forýmyna ázirlik aiasynda aimaqty damytý baǵdarlamasynyń tiimdi iske asyrylyp jatqanyn atap ótti.
– Petropavl qalasyn kórkeitý maqsatymen kóp jumys atqaryldy. Oblystyń ekonomikalyq kórsetkishteri qalypty. Ósim qarqyny respýblika boiynsha ortasha kórsetkishten joǵary, – dedi Elbasy.
Sonymen qatar, Memleket basshysy oblystyń agrarlyq áleýetine toqtalyp, bul óńirde aýyl sharýashylyǵy salasyn damytý qajettigin aitty.
– Elimizdegi aýyl sharýashylyǵy ónimderin óńdeý isi kóńil kónshiterliktei emes. Men aýyl sharýashylyǵyndaǵy eńbek ónimdiligin eki ese kóterý jóninde mindet qoidym. Bul sizderdiń oblystaryńyzǵa tikelei qatysty. Qaita óńdeý men eksportty ilgeriletý arqyly ǵana ónimdilikti arttyrýǵa bolady. Sizder úshin jańa tutyný naryqtary ashyldy, – dedi Qazaqstan Prezidenti.
Elbasy turǵyn úi jáne infraqurylym nysandaryn salý, áleýmettik baǵdarlamalardy iske asyrý jumystarynyń nátijelerine de toqtaldy. Atap aitqanda, 2018 jyly óńirdiń 6 myńnan astam turǵyny baspanamen qamtamasyz etilip, 150 myńnan astam jumysshynyń jalaqysy kóteriledi, sondai-aq óńirlik mańyzy bar joldar jóndeýden ótkiziledi.
Sońynda Nursultan Nazarbaev óńir jurshylyǵymen kezdesti. Oblys turǵyndary áleýmettik salaǵa qatysty baǵdarlamalar qabyldap, halyqqa udaiy qamqorlyq kórsetip kele jatqany úshin Memleket basshysyna alǵys bildirdi.
