Qazaqstan Prezidenti Nursultan Nazarbaev Belarýs Respýblikasyna jasaǵan resmi sapary aiasynda Qyrǵyzstan basshysy Sooronbai Jeenbekovpen ekijaqty kezdesý ótkizdi, dep habarlaidy QazAqparat tilshisi Minskiden.
«Birinshiden, Sooronbai Sháripulyn sailaýda jetken tabystarymen shyn júrekten quttyqtadym. Alys jerde bolsa da, osylai kezdesip qaldyq. Ekinshiden, eki eldiń arasyndaǵy týysqandyq-baýyrlastyq qatynastyń barlyǵyn ornyna keltiremiz dep kelistik. Ol - eki halyqtyń múddesi. Shekarada bolǵan jaǵdaidyń ne úshin oryn alǵanyn bárimiz bilemiz», - dep atap ótti Elbasy Minskidegi kezdesýden keiin BAQ ókilderine bergen suhbatynda.
Memleket basshysy aldaǵy bir-eki kúnde qyrǵyz Úkimetiniń delegatsiiasy Qazaqstanǵa arnaiy kelip, eki eldiń arasyndaǵy túitkildi problemalardy sheshýge baǵyttalǵan jol kartasyn qarastyratyndyǵyn aitty.
«Shekaraǵa eki jaqtan da baqylaý koiamyz. Qazaqstannan da, Qyrǵystannan da. EAEO-dan úsh adam árbir júkti qaraidy, biraq ótkize beretin bolady. Sondai baqylaýdy biz Qytaidyń shekarasynda da jasaimyz», - dedi Nursultan Nazarbaev.
Qazaqstan Prezidenti munan bólek, qyrǵyz áriptesin elimizge resmi saparmen kelýge shaqyrǵanyn da atap ótti.
«Jańadan sailanǵan Qyrǵyzstan prezidenti Sooronbai Sháripulyn men Qazaqstanǵa resmi saparmen shaqyryp otyrmyn. Sol kelgende barlyq sharýany artqa tastap, qazaq pen qyrǵyz arasyndaǵy jaǵdaidy túzetetin bolaiyq dep kelistik», - dedi Elbasy.
Óz kezeginde Qyrǵyzstan Prezidenti baýyrlas qazaq eline jaqsylyqtar tileitindigin basa aitty.
«Oryn alǵan problemalar boiynsha sóilesip, sheshimge keldik. Jol kartasy bar, eki eldiń Úkimetteri ázir ony jasaidy. Sodan keiin kóp másele sheshiledi. Shekaraǵa EAEO-qazaq-qyrǵyz tarapynan baqylaý qoimasaq, bolmaidy dep sheshtik. Bul problemalardyń bári - sheshiletin máseleler. Men jaýapkershilik alyp otyrmyn. Kóp másele bar, ony eki taraptan sheshemiz. Rahmet, Nursultan Ábishuly», - dedi Sooronbai Jeenbekov.
Aita keteiik, ekijaqty kezdesý qyrǵyz tarapynyń ótinishimen ótti.
