Nursultan Nazarbaev Aqtaýda Kaspii sammitine qatysý úshin kelgen Resei Federatsiiasynyń prezidenti Vladimir Pýtinmen kezdesti, dep habarlaidy "Ult aqparat" Aqordaǵa silteme jasap.
Memleket basshysy kórshi eldiń prezidentine yntymaqtastyq úshin jańa múmkindikter men perspektivalarǵa jol ashatyn Kaspii mańy elderiniń aitýly sammitine belsendi atsalysqany úshin rizashylyq bildirdi.
"Eki jaqty qarym-qatynastarymyz barlyq baǵytta, ásirese, ekonomika, áskeri-tehnika jáne ǵarysh salalarynda ilgerilep keledi. Eýraziialyq ekonomikalyq odaq aiasyndaǵy ekonomikalyq máseleler de qarqyndy damýda", – dedi Nazarbaev.
Vladimir Pýtin Nursultan Nazarbaevty Kaspii mańy elderi sammiti jumysynyń nátijelerimen quttyqtap, munyń Qazaqstannyń ózinde bolǵan oqiǵa retinde tarihqa enetinin aitty.
"Bul – jiyrma jyl ishinde qol jetkizilgen eleýli oqiǵa. Uzaqqa sozylǵan talqylaýlar men pikirtalastardan keiin sheshim tabyldy. Osy sheshimniń Kaspii mańy óńirindegi yntymaqtastyǵymyzdyń damýyna septigin tigizetini sózsiz", – dedi Resei prezidenti.
Pýtin eki el arasyndaǵy ózara taýar ainalymynyń artqanyn atap ótip, barlyq iri jobalar men baǵdarlamalar, sonyń ishinde ǵarysh, energetika jáne kólik salalary odan ári dami beretinin, sondai-aq elderimizdiń oń nátijelerge qol jetkizetinine senim bildiretinin aitty.
"Sizge Resei men Qazaqstan qarym-qatynastaryna erekshe kóńil bólgenińiz úshin rizalyǵymdy bildirgim keledi", – dedi ol.
Sonymen qatar, taraptar aldaǵy ýaqytta Petropavl qalasynda ótetin óńiraralyq forýmnyń jáne Dýshanbede bolatyn TMD sammitiniń máselelerin talqylady.
Al RIA Novosti aqparat agenttiginiń habarlaýynsha, Nursultan Nazarbaev Pýtinge Ujymdyq qaýipsizdik týraly shart uiymynyń bas hatshysy Iýrii Hachatýrovqa qatysty jaǵdaidy talqylaýdy usynǵan.
Hachatýrov on jyl buryn Armeniiada tóńkeris jasamaq boldy dep aiyptalyp otyr. 2018 jyldyń tamyz aiynyń basynda oǵan elden shyǵýǵa ruqsat berildi.
Iýrii Hachatýrov UQShU-nyń Bas hatshylyǵyna ótken jyly 3 jylǵa otyrdy. Endi Armeniia ony aýystyrmaq niette, óitkeni Hachatýrov 2008 jyly naýryzda memlekettik tóńkeris jasamaq boldy degen kúdikke ilingen.
