Qazaqstan Konstitýtsiiasynda Nursultan Nazarbaevtyń memleket negizin qalaýshy degen tarihi róli ǵana qalady.
Al Elbasy men onyń otbasyn qorǵaityn, artyqshylyqtar beretin Tuńǵysh Prezident týraly zańnyń kúshi joiylady. Bul týraly májilis spikeri Erlan Qoshanov málimdedi, dep habarlaidy Sputnik Qazaqstan.
Májilis kýlýarynda jýrnalister suraǵyna jaýap bergen spiker Konstitýtsiiadan Elbasynyń mártebesi men artyqshylyǵy týraly baptar alynyp tastalǵanyn atap ótti.
"Konstitýtsiiada tek qana memlekettiń negizin qalaýshy degen tarihi róli ǵana qaldy. Sondyqtan osy norma qabyldanǵannan keiin, Tuńǵysh Prezident týraly Konstitýtsiialyq zań da kúshin joiady dep kútilýde", - dedi Qoshanov.
Ol Konstitýtsiiadan Elbasy degen sóz alynyp tastalǵanyn aitty.
Sonymen qatar, Qoshanovtyń aitýynsha, Nazarbaevqa qatysty eks-prezident týraly norma qoldanylady. Búginde bul norma Konstitýtsiiada da, Prezident týraly zańda da bar.
Bul rette Májilis tóraǵasy eks-prezident týraly norma Nazarbaevqa qandai quqyq pen quzyret beretinin naqtylady.
"Birinshiden, ar-namysy men abyroi-bedelin qorǵaýǵa quzyret beredi. Ekinshiden, áleýmettik jaǵynan qorǵaý, iaǵni zeinetaqysy, kóligi, kúzeti bar. Osy máseleler memleket tarapynan retteledi", - dedi ol. Ol jerde Nazarbaevtyń otbasyn jaýapqa tartýǵa qatysty norma bar ma degen suraqqa spiker "ondai norma joq" dep jaýap berdi.
Aita keteri, 2000 jyly "Qazaqstan Respýblikasynyń Tuńǵysh Prezidenti - Elbasy týraly" konstitýtsiialyq zań qabyldanǵan bolatyn. Oǵan sáikes, Nursultan Nazarbaev pen onyń otbasy músheleri qorǵalady.
Konstitýtsiialyq zań boiynsha Nazarbaevty ustaýǵa, qamaqqa alýǵa, tintýge, odan jaýap alýǵa ne jeke basyn jete tekserýge, kúzetpen ustaýǵa bolmaidy.
Sonymen qatar, Elbasy men onymen birge turatyn otbasy múshelerine tiesili barlyq jeke múlikke tiisýge jáne shekteý qoiýǵa bolmaidy.
Jeke múlikke turǵyn jáne qyzmettik úi-jailar, qyzmettik kólik, bailanys quraldary, hattar, qujattar kiredi. Tiispeýshilik Qazaqstan Tuńǵysh prezidentiniń – Elbasynyń qoryna jáne ol qurǵan ózge de zańdy tulǵalarǵa tiesili múlikke de qoldanylady.
Budan bólek, konstitýtsiialyq zań Nazarbaev pen onymen birge turatyn otbasy múshelerine tiesili bank shottarynyń qupiialyǵyna jáne oǵan qol suqpaýyna kepildik beredi.
