Memleket basshysy Aqparat jáne kommýnikatsiialar ministri Dáýren Abaevty qabyldady, dep habarlaidy "Ult aqparat" Aqparat Aqordanyń baspasóz qyzmetine silteme jasap.
Kezdesý barysynda Memleket basshysyna «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri» atty joldaý aiasynda qoiylǵan mindetterdiń iske asyrylý barysy jóninde málimdeldi.
Elbasy innovatsiialar men jańa tehnologiialardy engizý jónindegi jumystardy jalǵastyrý, sondai-aq bul úrdiske «Qazaqstandaǵy 100 jańa esim» jobasyna qatysýshylardyń kreativti áleýetin paidalaný qajet ekenin atap ótti.
Sonymen qatar, Nursultan Nazarbaev qazaq tilin latyn qarpine kóshirý máselesine toqtalyp, memlekettik tildiń mártebesin arttyrýǵa baǵyttalǵan sharalar qabyldaýdyń mańyzdylyǵyn aitty.
– Halqymyz úshin latyn qarpine kóshý úderisiniń tarihi máni zor. Sonymen birge, qazaq tiliniń mártebesin arttyrý jónindegi jumystardy jalǵastyrý qajet. Parlament pen Úkimettiń qyzmeti tek memlekettik tilde júrgizilýge tiis. Sondai-aq, bul másele boiynsha azamattardyń quqyǵyn shekteýge bolmaidy. Olar úshin ilespe aýdarma jasaý múmkindigin qarastyrǵan jón, – dedi Qazaqstan Prezidenti.
Memleket basshysy latyn qarpine kezeń-kezeńmen kóshýdiń mańyzdylyǵyn aityp, qazaq tilin úiretý ádistemelerin jetildirý máselelerin jan-jaqty zertteýdi tapsyrdy.
Budan bólek, Elbasy kiberqaýipsizdikti qamtamasyz etý jáne otandyq buqaralyq aqparat quraldarynyń básekege qabilettigin arttyrý máselelerine nazar aýdardy.
Nursultan Nazarbaev elimizdiń telearnalaryndaǵy seriialyq ónimderdiń sapasyn arttyrý qajettigine toqtalyp, mass-media jastarǵa patriottyq tárbie berý isinde mańyzdy ról atqaratynyn atap ótti.
Kezdesý barysynda Dáýren Abaev Qazaqstan Prezidentine «Tsifrlyq Qazaqstan» baǵdarlamasyn iske asyrý jospary týraly baiandap, onyń basym baǵyttaryn túsindirýge bailanysty sharalar jóninde málimet berdi.
– Biz «Tsifrlyq Qazaqstan» memlekettik baǵdarlamasyn júzege asyrý jumystaryn jalǵastyrýdamyz. Jalpy, baǵdarlama aiasynda 120 birlesken is-shara kózdelgen, onyń jiyrmasy biyl oryndalatyn bolady, – dedi Aqparat jáne kommýnikatsiialar ministri.
Sondai-aq, D.Abaev Nursultan Nazarbaevqa «Astana EKSPO-2017» kórme kesheni infraqurylymynyń bazasynda qurylǵan «Astana Hub» halyqaralyq tehnoparki jumysynyń bastalǵanyn málimdedi.
Kezdesý sońynda Memleket basshysy birqatar naqty tapsyrma berdi.
