Nursultan Nazarbaev Parlament palatalarynyń birlesken otyrysyna qatysty, dep habarlaidy "Ult aqparat" Aqordaǵa silteme jasap.
Elbasy depýtattar aldynda sóilegen sózinde halyq qalaýlylaryn Parlamenttiń jańa sessiiasynyń ashylýymen quttyqtap, altynshy shaqyrylymnyń depýtattyq korpýsy joǵary kásibilik kórsetip, Úkimetpen ózara úilesimdi yqpaldastyq tanytqanyn atap ótti.
– Parlamenttiń úshinshi sessiiasynyń qorytyndysy boiynsha 87 zań qabyldandy, sonyń ishinde men jariialaǵan «Bes áleýmettik bastamanyń» tiisti normativtik quqyqtyq negizi qalyptasty. Bul alty millionnan astam qazaqstandyqtyń ál-aýqatyn arttyryp, ósip-órkendeýimizdiń basty sharty sanalatyn halqymyzdyń birligin nyǵaitýǵa múmkindik beredi, – dedi Nursultan Nazarbaev.
Memleket basshysy elimizdiń ekonomikalyq jetistikterine arnaiy toqtaldy.
– Qazaqstandaǵy ishki jalpy ónim 4 paiyzǵa artty, infliatsiia 5,9 paiyzǵa tómendedi, investitsiia kólemi 24 paiyzǵa ósti. Ekonomika men qoǵamnyń tiimdi jańǵyrýyna qajetti jaǵdailar jasalýda. Biz byltyrdan bastap ekonomikanyń álemdegi ortasha damý qarqynynan oza bastadyq. Óńdeý ónerkásibi, kólik jáne qyzmet kórsetý salalary siiaqty shikizattyq emes sektorlar ekonomikalyq ósimniń qozǵaýshy kúshine ainaldy, – dedi Qazaqstan Prezidenti.
Elbasy ári qarai dáiekti áleýmettik-ekonomikalyq damý úshin sapaly zań shyǵarý jumysyn jalǵastyrý qajet ekenin aitty.
– Ózin-ózi jumyspen qamtyǵandardy meditsinalyq jáne áleýmettik saqtandyrý, sondai-aq zeinetaqymen qamtý júiesine tartý – mańyzdy máselelerdiń biri. Tiisti ózgeristerdi osy jyldyń sońyna deiin qabyldaý qajet. Bul, ásirese, mindetti áleýmettik meditsinalyq saqtandyrý júiesine kóshý, meditsinalyq kómektiń kepildik berilgen kóleminiń jańa modelin engizý, qoǵamdyq densaýlyqty saqtaý máselelerin jáne meditsinalyq mekemelerde korporativtik basqarý júiesin jetildirý jumystaryna bailanysty bolǵandyqtan asa ózekti sanalyp otyr, – dedi Nursultan Nazarbaev.
Memleket basshysy qurylystyń qarqyndy damýyna bailanysty turǵyn úi-kommýnaldyq sharýashylyǵy salasynda turǵyndardy qanaǵattandyrmaityn kúrmeýli máselelerdiń bar ekenin atap ótip, jalpy úi sharýashylyǵy basqarmasynyń túsinikti ári tiimdi júiesin qurý kerektigin, sonymen qatar bul júieniń qyzmet kórsetýshi kompaniialar men turǵyndar arasyndaǵy qarym-qatynastyń ashyqtyǵy qaǵidatyna, sondai-aq qarajat shyǵyny men monopolisterdiń jaýapkershiligin baqylaýǵa negizdelýi tiis ekenin aitty.
Nursultan Nazarbaev orta jáne shaǵyn biznesti damytý barysyndaǵy oń úrdisterge toqtalyp, týrizm salasynyń kásipkerlikti damytýǵa tyń serpin berýi qajet ekendigin atap ótti.
– Úkimetke Týrizmdi damytýdyń 2023 jylǵa deiingi memlekettik baǵdarlamasyn ázirleý tapsyryldy. Bul qujat jyl sońyna deiin qarastyrylyp, qarjylyq turǵydan qajetti zańnamalyq baza arqyly bekitilýge tiis. Sonymen qatar, Parlamentte memlekettik satyp alý jáne kvazimemlekettik sektor úshin satyp alý máselelerine qatysty zań jobasy bar. Osy qujat atalǵan protsesti jeńildetýge, onyń tiimdiligin arttyrýǵa, sybailas jemqorlyq qaterin tómendetýge, basym baǵyttardy iske asyrý úshin qarjy bólýge jáne biznes ahýalyn jaqsartýǵa múmkindik beredi, – dedi Qazaqstan Prezidenti.
Memleket basshysy agroónerkásip kesheni salasyndaǵy zańnamany, sonyń ishinde saqtandandyrý, agrarlyq qolhattardy engizý, nesielik seriktestikterdi damytý, sondai-aq veterinariia salasynda baqylaý júiesin ońtailandyrý máselelerin odan ári jetildirý qajettigine toqtaldy.
– Qoǵamdyq sanany jańǵyrtýǵa arnalǵan «Rýhani jańǵyrý» baǵdarlamasynyń mańyzdy mindetteriniń biri tarihi-mádeni murany saqtap, keńinen tanytýdy qamtamasyz etý bolyp sanalady. Tiisti zań jobasyn qabyldaý úzdik álemdik tájiribege sáikes tarihi ári kieli nysandardy tiimdi damytýǵa, qorǵaýǵa septigin tigizedi, – dedi Nursultan Nazarbaev.
Shymkentke repýblikalyq mańyzy bar qala mártebesi berilýine jáne Túrkistan oblysynyń qurylýyna bailanysty Qazaqstan Prezidenti Parlamenttiń qaraýyna qaita qurylǵan ákimshilik-aýmaqtyq birlikterdiń tolyqqandy jumysyn qamtamasyz etýge baǵyttalǵan zań jobalary engiziletinin jáne olardyń shuǵyl qaralyp, qabyldanýy kerektigin aitty.
Jiyn sońynda Memleket basshysy depýtattardy sessiianyń ashylýymen taǵy da quttyqtap, Qazaqstannyń turaqty ári qarqyndy damý isinde odan ári tabysqa jete berýine tilektestik bildirdi.
