Qazaqstannyń Tuńǵysh Prezidenti Nursultan Nazarbaev Parlament Májilisiniń Tóraǵasy Nurlan Nyǵmatýlindi qabyldady, dep habarlaidy "Ult aqparat" Elbasy saityna silteme jasap.
Kezdesý barysynda Nursultan Nazarbaevqa byltyr kúzde ótken keńes barysynda berilgen tapsyrmalardyń «Nur Otan» partiiasy fraktsiiasynyń oryndaýy jóninde málimet berildi.
Elbasy depýtattardyń azamattardyń suranystaryna ýaqytyly jaýap berý jumystaryn jalǵastyrýdyń mańyzdylyǵyn atap ótti.
«Halyqtyń muń-muqtajyna qulaq asyp, etene jumys jasaý qajet. Bul – partiianyń, sondai-aq barlyq deńgeidegi depýtattardyń mindeti. Bizdiń ortaq paryzymyz», - dedi Qazaqstannyń Tuńǵysh Prezidenti.
Sonymen qatar, Nursultan Nazarbaev ekonomikalyq ósimge qol jetkizý, halyqtyń ál-aýqatyn arttyrý úshin atqarýshy jáne zań shyǵarýshy bilik tarmaqtarynyń úilesimdi jumysyn qamtamasyz etýdiń mańyzdylyǵyna toqtaldy.
«Aldymyzda el ekonomikasynyń ósimin qamtamasyz etý mindeti tur. Osy oraida Parlament pen partiia birlese jumys atqarýǵa tiis», - dedi Elbasy.
Sonymen birge, N. Nazarbaev Parlamenttiń rólin arttyrý máselesine nazar aýdarý qajettigin atap ótti.
«Úkimetti qalyptastyrýda Parlament negizgi ról atqarýǵa tiis. Zańdar men baǵdarlamalardy birge qabyldap, halyqqa birlese esep bergeni abzal», - dedi QR Tuńǵysh Prezidenti.
Kezdesý barysynda Nurlan Nyǵmatýlin Elbasyna Májilis depýtattarynyń óńirlerge saparlarynyń qorytyndylary jáne Parlamenttiń tómengi palatasynyń zań shyǵarý qyzmeti týraly aqparat usyndy.
«Osy jyldyń besinshi qańtarynan bastap depýtattar, onyń ishinde fraktsiia depýtattary elimizdiń barlyq óńirlerin, shalǵaida jatqan eldi mekenderdi aralap shyqty. Bul kúnderi depýttar jurtshylyqpen shamamen bir jarym myń kezdesý ótkizdi. Onda kóptegen máseleler kóterildi. Sonyń ishinde, áleýmettik kómektiń jańa formaty, jańa Densaýlyq saqtaý kodeksi, halyqty jumyspen qamtý máseleleri qozǵaldy. Aldaǵy zań shyǵarý isinde turǵyndardyń barlyq pikirleri men usynystary eskeriledi. Jalpy ótken jyldyń qyrkúiek aiynan beri Májilis qaraýyna 97 zań jobasy engizildi. Onyń 37-si qoldaý taýyp, Parlament Senatyna joldandy», - dedi Májilis Tóraǵasy.
