Elbasy Bilim jáne ǵylym ministri Erlan Saǵadievti qabyldady, dep habarlaidy "Ult aqparat" Aqoradaǵa silteme jasap.
Kezdesýde Memleket basshysyna Bilim berýdi jáne ǵylymdy damytýdyń 2016-2019 jyldarǵa arnalǵan memlekettik baǵdarlamasynyń iske asyrylý barysy jóninde esep berildi.
Nursultan Nazarbaev bilim berý júiesi elimizdegi saiasi, ekonomikalyq jáne áleýmettik reformalardy júzege asyrý isinde erekshe ról atqaratynyn atap ótti.
– Biz iske asyryp jatqan barlyq baǵdarlamalyq qujattarda, sonyń ishinde Qazaqstan halqyna arnalǵan «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri» atty biylǵy joldaý men «Rýhani jańǵyrý» baǵdarlamasynda, sondai-aq tsifrlandyrý barysynda bilim berý isine zor mán berilgen. Mekteptegi bilim berýdiń sapasy osy bastamalardyń tabysty júzege asyrylýynyń kepili bolyp sanalady, – dedi Qazaqstan Prezidenti.
Memleket basshysy elimizdiń bilim berý júiesindegi reformalardyń ýaqtyly júrgizilip jatqanyn aityp, jekelegen pánderdi aǵylshyn tilinde oqytýǵa kóshý úderisine erekshe toqtaldy.
– Pánderdi aǵylshyn tilinde oqytý joǵary synyp oqýshylary arasynda júrgiziledi. Balalarǵa aǵylshyn tilin qazir úiretpesek, keleshekte olardan kásibi mamandar daiarlai almaimyz. Bul – ýaqyt talaby. Ata-analar muny durys túsinýge tiis. Bul rette, qazaq tilin oqytýdy da umytpaýymyz kerek, – dedi Elbasy.
Kezdesýde Bilim jáne ǵylym ministri memlekettik jáne salalyq baǵdarlamalar aiasynda ministrlik aldyna qoiylǵan mindetterdiń oryndalý barysy jóninde málimdedi.
E.Saǵadiev mektepke deiingi bilim berý júiesin jetildirý baǵytynda atqarylyp jatqan jumystyń aralyq nátijeleri jóninde baiandady.
– 2018 jyly mektepke deiingi bilim berýmen qamtý kórsetkishi 95 paiyzǵa jetedi. Negizinen, bul jeke balabaqshalar qurylysynyń esebinen júrgizilip otyr. 2019 jyldan bastap erte jetilýdiń biryńǵai standarttary engiziledi. Sondai-aq, balabaqsha kezegine mobildik qurylǵylardy qoldaný arqyly da turýǵa bolatynyn aityp ótken jón, – dedi Bilim jáne ǵylym ministri.
Sonymen birge, E.Saǵadiev Qazaqstan Prezidentine mektepterdi Nazarbaev ziiatkerlik mektepteriniń tájiribesi boiynsha jańa mazmunǵa kóshirýdiń nátijeleri jóninde aitty.
Bilim jáne ǵylym ministri jekelegen pánderdi aǵylshyn tilinde oqytý úshin muǵalimder daiarlaý barysy jóninde málimdedi.
– 2016 jyly aǵylshyn tilinde 2 myń ǵana muǵalim sabaq bergen bolatyn. Byltyr 11,5 myń muǵalim tiisti aǵylshyn kýrsynan ótýge ótinish bildirip, olardyń 3 myńǵa jýyǵy daiarlyǵyn aiaqtap, sabaq berýge kiristi. 8 myń muǵalim oqýyn jalǵastyryp, qajetti deńgeige aýysýda. Osylaisha, 2019 jyly 13,5 myń muǵalim tórt pándi aǵylshyn tilinde berýdi bastaidy, – dedi E.Saǵadiev.
Kezdesý sońynda Nursultan Nazarbaev birqatar naqty tapsyrma berdi.
