Elbasy Ózbekstan Respýblikasynyń Prezidenti Shavkat Mirziioevpen kezdesti, dep habarlaidy elbasy.kz saity.
Nursultan Nazarbaev Shavkat Mirziioevti ótken prezident sailaýyndaǵy aiqyn jeńisimen quttyqtap, baýyrlas Ózbekstan halqynyń igiligi jolyndaǵy jasampaz qyzmetine jańa tabystar tiledi.
«Sailaýaldy naýqan barysynda Siz usynǵan «Jańa Ózbekstan» strategiialyq baǵdarlamasynda naqty maqsattar men mindetter aiqyndalǵan. Halyq memlekettiń qai baǵytta damyp kele jatqanyn bilip otyrýǵa tiis. Kezinde men de «Qazaqstan – 2030» Strategiiasyn, keiin elimizdiń 2050 jylǵa deiingi damý baǵdarlamasyn usynǵan edim. Men memleket basshysy laýazymynda bolǵan jyldary árdaiym bizdiń elderimiz arasyndaǵy ekijaqty bailanystardy damytýǵa basa mán berdim. Siz muny jaqsy bilesiz», – dedi Qazaqstannyń Tuńǵysh Prezidenti.
Elbasy búgin eki el basshylary qol qoiǵan Odaqtastyq bailanystar týraly deklaratsiianyń mańyzyna toqtalyp, Qazaqstan men Ózbekstan qatynastarynyń jańa paraǵy ashylǵanyn atap ótti.
«Bizdi ortaq tarihymyz, mádenietimiz ben salt-dástúrimiz bailanystyrady. Elderimizdiń arasyndaǵy dostyq qarym-qatynastyń mańyzy zor. Ol týyndaǵan máselelerdi sheshýge septigin tigizedi. Ózińizge málim, men óńirimizdegi bes memleketti ekonomikalyq keńeske biriktirýge tyrystym. Sol úshin Ortalyq Aziia elderi basshylarynyń konsýltativtik keńesin qurýdy usyndym. Osy bastamany qoldaǵanyńyz úshin Sizge rizashylyǵymdy bildiremin», – dedi Nursultan Nazarbaev.
Óz kezeginde Sh.Mirziioev Qazaqstannyń barlyq jetistikterine Tuńǵysh Prezidenttiń saliqaly saiasatynyń arqasynda qol jetkizilgenin aitty. Sonymen qatar Elbasynyń Qazaqstan-Ózbekstan strategiialyq yntymaqtastyq qatynastarynyń qalyptasýy men damýyna qosqan súbeli úlesine basa mán berdi.
«Táýelsizdiktiń 30 jyly ishinde Siz qazirgi qarym-qatynasymyzdyń negizin qaladyńyz. Elderimiz arasynda árdaiym ashyq ári senimdi bailanys bolsyn dedińiz. Sońǵy bes jylda osy baǵytta serpilis bar ekenin baiqap otyrmyz. Sizben birge jumys istei bastaǵan kezde Ózbekstan men Qazaqstan arasyndaǵy saýda ainalymy 317 million dollar bolatyn, qazir ol 4,5 milliard dollardan asady. Búgin Qasym-Jomart Kemeluly Toqaevpen aldymyzǵa bul kórsetkishti úsh-tórt jylda 10 milliard dollarǵa jetkizý týraly mańyzdy maqsat qoidyq», – dedi Ózbekstan Prezidenti.
