Qazaqstan prezidenti Nursultan Nazarbaev jastarǵa adal eńbekpen aqsha tabýǵa keńes berdi, dep habarlaidy Sputnik Qazaqstan tilshisi.
"Qazaqstannyń 100 jańa esimi" jobasynyń kezekti jeńimpazdarymen kezdesken memleket basshysy jastarǵa neniń uiat, neniń uiat emes ekenin ajyratyp berdi.
"Men páter jinaý uiat emes ekenin jastarǵa únemi aityp júremin. Ras qoi?! Jumyssyz ári baqytsyz bolý uiat. Osynsha jumys turǵan kezde, áielderge óz tánin satý uiat", - dedi Nazarbaev kezdesý barysynda.
Prezident adamdarǵa bala baǵý, páter jinaý, tamaq daiyndaý sekildi neshe túrli qyzmet kórsetetin kompaniiany mysalǵa keltirdi.
"Olar osylai aqsha taýyp júr. Mine, bul jumys", - dedi Elbasy.
Sonymen qatar, memleket basshysy ultty saqtap qalý úshin qyzdardy aialaýǵa shaqyrdy. Ol qyzdar az dúniege keletin memlekettiń bolashaǵy joq ekenin atap ótti.
"Memlekette áielder azaiǵan saiyn, ult joiylady", - dedi Nazarbaev.
Osy oraida prezident Qytaidaǵy statistikany mysal etti.
"Qytaida erler áielderge qaraǵanda 60 millionǵa kóp. Olar óziniń ómirlik serigin tabý úshin basqa elderge barady. Ári-beriden soń, 3000 jylǵa qarai qazir qyzdary az ulttardyń joq bolatynyn eseptep qoiǵan. Muny oilaýdyń ózi qiyn, sondyqtan qyzdarymyzdy aialaiyq", - dedi Nazarbaev.
Aita ketsek, búgin "Rýhani jańǵyrý" baǵdarlamasy aiasynda "Qazaqstannyń 100 jańa esimi" jobasynyń ekinshi kezeńi qorytyndylandy. Jobaǵa 2388 ótinim túsken. Sarapshylar toby 200 úmitkerdi iriktep aldy. Sońǵy onlain daýys berý arqyly 29 adam jeńimpaz atandy.
