Qazaqstan Prezidenti «№1 Óskemen qalalyq aýrýhanasy» kommýnaldyq memlekettik kásipornynyń Robottandyrylǵan hirýrgiia ortalyǵyna bardy, dep habarlaidy "Ult aqparat".
Nursultan Nazarbaev «№1 Óskemen qalalyq aýrýhanasy» kommýnaldyq memlekettik kásipornynyń bazasynda qurylǵan Qazaqstandaǵy tuńǵysh Robottandyrylǵan hirýrgiia ortalyǵynyń jumysymen tanysty. Ortalyqty aralaý barysynda Memleket basshysyna zamanaýi operatsiialyq-tsifrlyq keshenniń jumysy men onyń damý perspektivalary jóninde baiandaldy.
Sonymen qatar, Qazaqstan Prezidenti telekópir rejiminde oblystyń Aiagóz jáne Zyrian aýdandaryndaǵy insýlttik ortalyqtardyń ujymdarymen áńgimelesti.
Elbasy shalǵai eldi mekenderde meditsinalyq ortalyqtar salý maqsatymen memleket tarapynan atqarylyp jatqan jumystardyń nátijelerine toqtaldy.
Memleket basshysy júrek-qan tamyry aýrýlaryn emdeý sapasyn jaqsartýdyń jáne bala men ana óliminiń aldyn alýdyń mańyzdylyǵyn atap ótti.
– Qazaqstannyń árbir oblysynda júrek-qan tamyry aýrýlarynan qaitys bolatyndardyń sanyn azaitý maqsatymen júrekke ota jasaityn meditsinalyq ortalyqtar salyndy. Qazirgi ýaqytta ólim-jitim kórsetkishin tómendete aldyq, – dedi Qazaqstan Prezidenti.
Sonymen qatar, Nursultan Nazarbaev salamatty ómir saltyn nasihattaý arqyly túrli aýrýlardyń aldyn alý qajettigin aitty.
– Bizdiń densaýlyǵymyzdyń 10-15 paiyzy ǵana dárigerler men meditsinaǵa, qalǵany ózimizdiń ómir súrý saltymyzǵa bailanysty. Bolashaq náresteniń densaýlyǵy ananyń densaýlyǵyna bailanysty ekenin túsindirý qajet, – dedi Memleket basshysy.
Memleket basshysy densaýlyq saqtaý salasyndaǵy robottandyrylǵan hirýrgiia júieleriniń tiimdiligine toqtaldy.
Osyǵan orai Elbasy meditsina salasyndaǵy kadrlardy sapaly daiarlaýdy qamtamasyz etýdiń qajettigin de atap ótti.
Sońynda Qazaqstan Prezidenti ortalyqtyń qyzmetkerlerine jáne emdelýshilerge zor densaýlyq pen tabys tiledi.
