Elbasy oblystardyń jáne Astana, Almaty, Shymkent qalalarynyń ákimderimen keńes ótkizdi, dep habarlaidy "Ult aqparat" Aqordaǵa silteme jasap.
Qazaqstan Prezidenti halyqtyń turmys sapasy men ál-aýqatyn arttyrý memlekettiń negizgi mindeti sanalatynyn aitty.
– Eń bastysy – áleýmettik máseleler, kommýnaldyq qyzmetke qatysty tarifter, asa qajetti azyq-túlik pen dári-dármek baǵasy. Munyń bárin sizder airyqsha baqylaýda ustaýlaryńyz kerek, – dedi Memleket basshysy.
Nursultan Nazarbaev jylý berý maýsymy aiaqtalǵanǵa deiin turǵyn úi-kommýnaldyq sharýashylyq nysandarynyń úzdiksiz jumys isteýin qamtamasyz etý, sondai-aq kúnniń jylynýyna bailanysty sý tasqyny qaýpiniń aldyn alý máselelerine arnaiy toqtaldy.
– Byltyr apatty jaǵdailar kóp boldy, biyl onyń qaitalanýyna jol bermeý kerek. Tabiǵattyń qaýip-qaterlerine qarsy shuǵyl áreket etip, aldyn ala tiisti sharalar qabyldaý qajet. Shyǵys Qazaqstan oblysynyń Úrjar aýdanynda 800-dei adam men 280 avtokólik qar qursaýynda qalyp qoiǵan. Biz adamdardy qaýipti jaǵdaida qaldyrmaýymyz kerek. Tótenshe jaǵdailardyń saldaryn joiý, onyń aldyn alýǵa qaraǵanda, birneshe ese qymbatqa túsedi, – dedi Elbasy.
Sonymen qatar, Qazaqstan Prezidenti azamattardyń aryzdary men ótinishterin ózara is-qimyldyń «kedergisiz» formatyn qalyptastyrý arqyly shuǵyl qarastyrý qajet ekenin aitty.
Memleket basshysy elimizdegi oń ózgeristerdiń basty qozǵaýshy kúshi sanalatyn belsendi jastarmen jumys júrgizý qajettigine nazar aýdardy.
– Men jaqynda jastarmen kezdestim. Óńirlerińizde talapty jas azamattar bar. Eger bir ret bolsa da olardyń basyn qosyp, áńgimelesseńizder, kóptegen mańyzdy usynystar estisizder. Qoǵamnyń osyndai belsendi ókilderin jumysqa tartyp, olardy ózgelerge úlgi etý kerek, – dedi Nursultan Nazarbaev.
Elbasy óńirlerdegi azamattardyń jeke qaýipsizdigi men qoǵamdyq tártipti qamtamasyz etý isine oblystardyń jáne respýblikalyq mańyzy bar qalalardyń ákimderi jaýap beretinin aitty.
– Biz quqyq qorǵaý júiesin reformalaýǵa kiristik. Sizderge politsiia departamentteriniń bastyqtaryn taǵaiyndap, qoǵamdyq tártipti saqtaý jáne quqyq buzýshylyqtyń aldyn alý jóninde mindetter belgileý quqyǵyn berdik. Sizder jergilikti jerlerdegi tártip úshin solarmen birdei jaýap beresizder, – dedi Qazaqstan Prezidenti.
Memleket basshysy kóktemgi dala jumystaryn tehnikamen, tuqymmen, tyńaitqyshpen jáne janar-jaǵarmaimen ýaqtyly qamtamasyz etý, sondai-aq birqatar iri aýyl sharýashylyǵy taýarlaryn óndirýshilerdiń qaryzyna qatysty máselelerdi sheshý qajettigine arnaiy toqtaldy.
Sońynda Nursultan Nazarbaev Prezident Ákimshiligine búgin júktelgen barlyq mindetterdiń iske asyrylýyn baqylaýǵa alýdy tapsyrdy.
