Memleket basshysy VIII Azamattyq forým qatysýshylaryna eshnársege qaramastan ómirdiń qiyndyqtaryn ótkere bilý kerektigin aitty, dep jazady Sputnik.
Prezident ómirinde bolyp jatqan qiyndyqtarǵa, on eki múshesi saý bolmasa da, qol qýsyryp qalmaityn adamdardan erekshe shabyt alatynyn jetkizdi.
"Únemi ómirge laǵnet aityp júremiz: birde mynaý, endi birde ekinshisi jetpei jatady. Eger ómirden túńilip ketseń, aýrýhanalardy, tipti, bolmai jatsa, zirat basyna bar. Sol jerde jatqan jandardyń jaǵdaiy saǵan qaraǵanda áldeqaida qiyn. Qol-aiaǵymyz saý bolsa da, kishkene súrinsek, ómirden túńilip ketemiz. Ómirde barlyǵy da múmkin — ózińdi qolǵa alyp, jumys isteýge májbúrle. Bar másele osyda. Sondai-aq, jastardy da osy nársege úiretýimiz qajet", — dedi Nazarbaev.
Munymen qatar, memleket basshysy eriktiler qozǵalysyn damytý kerektigin atap ótti. Prezidenttiń pikirinshe, dál qazir eriktilerdi qoǵamdyq jobalarǵa tartý kerek.
"Birinshi kezekte memleketti órkendetý úshin ashyq dialogtyń mańyzy zor. Azamattar sanaly qadamdarǵa baryp, damyǵan memlekette ómir súrýi tiis. Biz myqty 30 eldiń qataryna mindetti túrde kiremiz", — dep qosty Elbasy.
Budan ózge ol úkimetten tys sektorǵa qariialardyń densaýlyǵyna erekshe mán berilýi kerektigin aitty.
"Adamnyń qanshalyqty tez qartaiatynyn sizder, tipti, bilmeisizder. Jetimder úii men qarttar úiin biriktirý týraly usynystar bar. Olar kúndelikti balalar tárbiesimen ainalysatyn bolady. Bálkim osy nusqany qarastyryp kórý kerek shyǵar", — dedi memleket basshysy.
Nursultan Nazarbaev 27-28 qarasha kúnderi Astana qalasynda ótip jatqan Azamattyq forýmnyń bas spikeri boldy.
