Búgin Aqordada QR Prezidenti Nursultan Nazarbaev bir top sheteldik ǵalymdarmen kezdesti. Olardyń arasynda Nobel syilyǵynyń laýreattary, tanymal professorlar, kompaniia basshylary men burynǵy prezidentter bar. Barlyǵy Astana ekonomikalyq forýmyna qatysýǵa kelgen. Prezident olardy Aqordada qabyldap, álemdegi saiasi-ekonomikalyq júieniń qalaisha ózgerip jatqanyn jetkizdi, dep xabarlaidy QazAqparat.
«Búginde texnologiialardyń damýymen ainaladaǵy álemniń qalaisha ózgerip jatqanyn bárimiz kórip otyrmyz. Elektromobilder, júrgizýshisi joq kólikter, nanotexnologiialar, energiianyń jańa kózderi - bári-bári buryn fýtýristik kózqaras bolyp sanalatyn. Qazir sonyń barlyǵy keldi. Álemdik saiasatta da biraz ózgerister bolyp jatyr. Jaqynda biz Shanxai yntymaqtastyq uiymynyń kezekti sammitin ótkizdik. Sol kezde uiymnyń quramyna Úndistan men Pákistan qabyldandy. Osylaisha, bizdiń qatarymyz 3 mlrd adamnan asty. Bul álemdik ekonomikada ǵana emes, álemdik saiasatta da basty faktor bolyp sanalady», - dedi Nazarbaev kezdesý barysynda.
Osy oraida Memleket basshysy Tynyq muxittan Batys Eýropaǵa deiin jalǵasatyn Jibek jolynyń jandanyp jatqanyn jetkizdi. Osynyń nátijesinde jańa saiasi-ekonomikalyq poliýstar qalyptasyp keledi. Ol da shynaiy ómirdiń kórinisine ainaldy.
