QR Prezidenti Nursultan Nazarbaev elimizdiń Konstitýtsiialyq Keńesine júginý sebebin túsindirdi, dep habarlaidy "Ult aqparat".
«Qazaqstan Respýblikasynyń Konstitýtsiiasy qabyldanǵan 1995 jyldan bastap qazirgi ýaqytqa deiin Konstitýtsiialyq Keńeske 220, onyń ishinde 22 prezidenttik júginý jiberildi. «QR Konstitýtsiialyq keńesi týraly» Zańǵa sáikes Konstitýtsiialyq Keńes Konstitýtsiiany resmi túsindirý quqyǵyna ie. Zańnamada olqylyqtardyń bolýy qalypty qubylys sanalady. Máselen, Konstitýtsiiada Prezidenttiń aýysý sharttary aiqyndalmaǵan, sonymen qatar onyń otstavkaǵa erikti túrde ketý jaǵdaiy qarastyrylmaǵan. Álemniń barlyq konstitýtsiialarynda mundai norma bar. Bul aspektiniń úlken ózektiligine bailanysty Konstitýtsiialyq keńeske osy qaǵidany túsindirýdi ótindim», - dedi Elbasy Aqorda taratqan videomaterialda.
QR Prezidenti búginde qoǵamnyń sailaý máselesine qyzyǵýshylyq tanytyp otyrǵandyǵyn da atap ótken.
«Degenmen bul taqyryptyń tóńireginde dúrbeleń týdyrýdyń qajeti joq. El Konstitýtsiiasynda, «Qazaqstan Respýblikasynyń Prezidenti týraly» Konstitýtsiialyq zańda sailaýlardy ótkizý tártibi men ýaqyty, ókilettiliktiń aiaqtalý merzimi naqty jazylǵan. Konstitýtsiia aiasynda Prezidenttiń merziminen buryn sailaý jariialaýǵa quqyǵy bar. Biraq, mundai jaǵdai oryn almaidy. Sondyqtan tynyshtyq saqtap, kúndelikti qyzmetpen ainalysýdy jalǵastyra berý qajet», - dedi Nursultan Nazarbaev.
