Úsh tildilikti engizý aqylǵa qonymdy júrgizilýi tiis. Bul týraly búgin «Nur Otan» partiiasynyń kezekti XVIII sezinde Memleket basshysy Nursultan Nazarbaev aitty, dep habarlaidy QazAqparat tilshisi.
«Bilim salasyndaǵy reformany da logikalyq nátijelerge deiin jetkizý qajet. Qazirgi zamanǵy shyndyq bizdiń balalarymyzda jańa daǵdylar men quzyretterdi damytýdy talap etedi. Men úsh tildilik birtindep normaǵa ainalýy tiis ekendigin aitqan bolatynmyn. Bizdiń balalarymyz - olar jahan balalary. Olar búkil álemdik keńistikte, úzdik joǵary oqý oryndarynda bilim alýda. Sondyqtan qazaq, orys jáne halyqaralyq aǵylshyn tilin bilý mańyzdy», - dedi Prezident «Nur Otan» partiiasynyń XVIII sezinde.
Biraq, Elbasy muny asyǵys júrgizbeý qajettigin eskertti.
«Aldymen pedagogterdi daiyndap alý qajet. Aǵylshyn tilin biletin fizika, matematika jáne himiiadan sabaq berýge qabiletti pedagogty qanshama oqytý qajet. Al bizdiń ministrlik erteńnen bastap-aq muǵalimderge sabaq bere bastaýdy tapsyrdy. Úsh aiǵa kýrsqa shaqyryp, oqytasyńdar. Alaida kim úsh aidyń ishinde matematikany aǵylshyn tilinde úirete alady? Buǵan qosa, mol qarajat ta jumsaldy. Shetelden muǵalimderdi shaqyryp, sabaq berýdi bastaǵan jeńilirek bolar ma edi. Sondyqtan bul maqsat pen mindet qala beredi jáne ministrlik bul turǵyda da durys baǵytta da boldy. Joǵary oqý oryndaryna qatysty da durys saiasat júrgize aldy. Biraq, munyń barlyǵy aqylǵa qonymdy bolýy ári adamdarǵa nelikten, qashan ekendigi túsindirilýi tiis edi», - dedi Nursultan Nazarbaev.
Memleket basshysy árbir óńirde aldyńǵy qatarly bir joǵary oqý orny bolýy kerektigin basa aitty.
"Árbir óńirde keminde bir ilgeri joǵary oqý orny, iaǵni, 17 óńirde mundai 17 JOO jáne 10 zamanaýi kolledjden bolýy tiis. Oqý oryndarynyń tiimdiliginiń basty kriteriii - bul túlekterdiń jumysqa ornalasýy. Ýniversitet túlegi jumysqa ornalassa bul ýniversitettiń baǵalanýy, mamandarynyń qajet ekendigi", - dedi Elbasy.
