Nursultan Nazarbaev «Kazahstanskaia pravda» gazetine bergen suhbatynda Astana qurylysynyń alǵashqy jyldaryn eske aldy, dep habarlaidy QazAqparat.
«Meniń dosym I Hýan Karlos II Filipp korol bolǵan shaqta el astanasyn Toledodan Madridke kóshirýdiń naǵyz daýǵa ainalǵanyn aityp bergen edi. Djordj Vashington da elsiz dalada jańa astana salǵanda aiaýsyz synnyń astynda qaldy. Meniń de tarapyma biraz syn aityldy. Tipti bir gazet «Prezident Nazarbaevtyń jeke astanasy» degen taqyryppen maqala shyǵardy. Onda «eńbekaqy men zeinetaqyǵa jumsalatyn aýqymdy qarajatty jymqyrýdy eshqandai strategiialyq jospar aqtai almaidy» dep jazǵan. Halyq arasynda Aqmolada jaz boiy ańyzaq jel soǵady, qysta qalany qar basady, qalanyń ózi batpaq ústine tur, deni durys aýyz sý da joq degen áńgimeler órip júrdi», - dep eske aldy Prezident.
Ol týǵan ólkede jaman jerdiń jáne jaman aýa raiynyń bolmaitynyn atap ótti.
«Árine, mundaǵy klimatty keremet dep aitýǵa kelmeidi. Dala borany soǵady. Bir kúni boranǵa bailanysty, áýejai tutas táýlikke jabylǵan. Onda tikushaq ta qondyra almai, Astanaǵa Kókshetaýdan poiyz arqyly jetkenim bar. Týǵan ólkeńniń jaman jeri bola ma eken? Munyń barlyǵy - bizdiń Otanymyz, Otanymyzdyń klimaty, Otanymyzdyń tabiǵaty. «Týǵan jerdiń tútini de qymbat» degen sóz bar. Saryarqanyń tabiǵaty ózinshe sulý. Bir jaǵynda - Qorǵaljyn, ekinshi jaǵynda - Býrabai. Úshinshi jaqta - Ereimentaý, ári qarai - Qarqaraly, Baianaýyl bar», - dedi Nursultan Nazarbaev.
«Ókinishke qarai, qalany halyqaralyq tanystyrylymǵa daiyndyq barysyn «Oba kezindegi toiǵa» teńegen jýrnalister boldy. Gazetter men telearnalar Aqmolanyń masalary týraly «armansyz» jazdy, siýjet kórsetti. Ondai materialdardyń eshqaisysyna mán bermedim. Mán berýge ýaqyt ta bolmady. Filosoftar aitqan sóz bar: «Eger aldyńa maqsat qoisań, oǵan jeter jolda ár úrgen itke taiaq laqtyrsań, maqsatyńa múldem jetpeisiń». Eshteńege qaramastan, aldymda qoiǵan maqsatqa týra júre berdim», - dedi ol.
Sonymen birge, Prezident qalany masadan tazartý, topyraqty keptirý, abattandyrý jumystaryn qalai júrgizgenin aityp berdi.
«Masalardan arylýdyń eń úzdik joly qaladaǵy topyraqty keptirý boldy. Bul máseleni óte jyldam sheshtik. Esildiń boiyndaǵy qamys-qopalary shabyldy, qala ishindegi bos keńistikterge gúlder egildi, asfalt tóseldi. Osylaisha, qysyr ósek-aiańdar sirei bastady (...) El astanasyn aýystyrý arqyly ózimniń saiasattaǵy keleshegimdi qaterge tigip otyrǵanymdy túsindim. Biraq, iske kirisip kettik. Aqmolaǵa ai saiyn baratynmyn, áýejaidan tike qurylys nysandaryna bet alatynmyn», - dep eske aldy Nursultan Nazarbaev.
Suhbattyń tolyq mátinin «Kazahstanskaia pravda» gazetinen oqýǵa bolady.
