Memleket basshysy «Nur Otan» partiiasy Tóraǵasynyń birinshi orynbasary Máýlen Áshimbaevty qabyldady, dep habarlaidy "Ult aqparat" Aqordaǵa silteme jasap.
Kezdesýde Qazaqstan Prezidentine partiianyń qazirgi qyzmeti jóninde málimet berilip, «Jas Otan» jastar qanatynyń IV seziniń qorytyndysy týraly baiandaldy.
Elbasy memlekettik saiasatty iske asyrý úderisinde partiianyń jastar qanaty mańyzdy missiia atqaratynyn aitty.
– «Jas Otan» jastar qanatynyń sezi tabysty ótti. Meniń tapsyrmama sáikes, jastar arasynda saiasi jumys júrgizilýge tiis. «Jas Otannyń» maqsaty – Qazaqstan jastarynyń barlyǵyn biriktirý, – dedi Nursultan Nazarbaev.
Kezdesý barysynda Máýlen Áshimbaev sezdiń qorytyndysy boiynsha qol jetkizilgen nátijelerge toqtaldy.
– IV sezge barlyq oblystar men óńirlerden 1500-den astam delegat qatysty. Forýmnyń birinshi kúni partiianyń konferentsiiasy jáne arnaiy bes paneldi sessiia ótti, – dedi «Nur Otan» partiiasy Tóraǵasynyń birinshi orynbasary.
Budan bólek, M.Áshimbaev Nursultan Nazarbaevqa strategiialyq memlekettik jáne salalyq baǵdarlamalardy, sonyń ishinde «Rýhani jańǵyrý» jáne «Tsifrlyq Qazaqstan» baǵdarlamalaryn júzege asyrý úderisine partiianyń atsalysýy týraly baiandady.
Sondai-aq, «Nur Otan» partiiasy Tóraǵasynyń birinshi orynbasary Memleket basshysyna partiianyń kadrlyq rezervin qalyptastyrý barysy jóninde málimdedi.
Kezdesý sońynda Nursultan Nazarbaev partiianyń túrli baǵyttaǵy jumysyn jandandyrý úshin birqatar naqty tapsyrma berdi.
