Elordada M. V. Lomonosov atyndaǵy Máskeý memlekettik ýniversitetiniń Qazaqstan filialynyń 20 jyldyq mereitoiy toilandy, dep habarlaidy QazAqparat.
Qurmetti qonaqtar arasynda QR Prezidenti Ákimshiliginiń, QR Tuńǵysh Prezidenti – Elbasy Keńsesiniń, QR Parlamentiniń depýtattyq korpýsynyń, Resei Elshiliginiń, Qazaqstandaǵy Rossotrýdnichestvo ókildigi jáne MMÝ qazaqstandyq filialynyń ár jyldardaǵy túlekteri, oqytýshylar, stýdentter boldy.
Salatanatty jiynynda Qazaqstan Respýblikasynyń Memlekettik hatshysy Qyrymbek Kósherbaev QR Tuńǵysh Prezidenti – Elbasy Nursultan Nazarbaevtyń quttyqtaý hatyn oqyp berdi.
«M. V. Lomonosov atyndaǵy MMÝ Qazaqstan filialynyń ujymyna! Sizderdi M. V. Lomonosov atyndaǵy Máskeý memlekettik ýniversitetiniń Qazaqstan filialynyń qurylǵanyna 20 jyl tolýymen quttyqtaimyn. Meniń bastamam boiynsha jáne RF Prezidenti V.V. Pýtinniń qoldaýymen qurylǵan bul joǵary oqý orny – qos eldiń dostyǵy men strategiialyq áriptestiginiń jarqyn úlgisi boldy. Men 1994 jyly Eýraziialyq odaqty qurý ideiasyn da Máskeý ýniversitetinde aitqan edim. Al qazir onyń filialy Eýraziianyń ortalyǵynda tabysty qyzmet etýde», - deidi N. Nazarbaev.
Óz sózinde Elbasy filial túlekteriniń Táýelsizdiktiń 30 jyldyǵyn atap ótip jatqan Qazaqstannyń damýy men gúldenýine laiyqty úles qosyp júrgenderin atap ótti.
«Zamanaýi jáne keńinen oilaityn mamandardy darialaý jáne birlesken ǵylymi zertteýler júrgizý otandyq joǵary bilim kóshbasshylarynyń biri retinde JOO áleýetin odan ári ósirýge yqpal etedi. MMÝ Qazaqstan filialynyń ujymyna elimizdiń igiligi úshin jańa tabystar men jetistikter jáne Qazaqstan-Resei yntymaqtastyǵyn ári qarai ilgeriletýdi tileimin», - dedi N. Nazarbaev.
Aita keteiik, M. V. Lomonosov atyndaǵy MMÝ Qazaqstan filialy QR Tuńǵysh Prezidenti - Elbasy Nursultan Nazarbaevtyń bastamasymen jáne RF prezidenti Vladimir Pýtinniń qoldaýymen qurylǵan.
2000 jylǵy 9 qazanda Resei Federatsiiasynyń Prezidenti V.V. Pýtinniń Qazaqstan Respýblikasyna jasaǵan memlekettik saparynda MMÝ rektory, akademik V.A. Sadovnichii men QR Bilim jáne ǵylym ministri Q.E.Kósherbaev Astana qalasynda L.N.Gýmilev atyndaǵy Eýraziialyq ulttyq ýniversitettiń bazasynda M.V. Lomonosov atyndaǵy Máskeý memlekettik ýniversitetiniń Qazaqstan filialyn qurý týraly hattamaǵa qol qoiǵan bolatyn.
