Qazaqstannyń Tuńǵysh Prezidenti Nursultan Nazarbaev Belarýs Respýblikasynyń Prezidenti Aleksandr Lýkashenkomen telefon arqyly sóilesti, dep habarlaidy "Ult aqparat" elbasy.kz-ke silteme jasap.
Nursultan Nazarbaev pen Aleksandr Lýkashenko dástúrli dostyq pen ózara túsinistikke negizdelgen Qazaqstan-Belarýs yntymaqtastyǵynyń damý qarqynyna joǵary baǵa berdi.
Taraptar ár túrli deńgeidegi ózara saparlardyń jáne birlesken kelisimderdi júzege asyrýdyń arqasynda ekijaqty saýda ainalymy kólemin jylyna 1 milliard AQSh dollaryna deiin arttyrý boiynsha qarqyndy jumys júrgizilip jatqanyn aitty.
Nursultan Nazarbaev pen Aleksandr Lýkashenko Qazaqstan men Belarýs úkimetteriniń koronavirýs pandemiiasyn eńserýge baǵyttalǵan sharalary týraly pikir almasty.
Elbasy men Belarýs Prezidenti eki el arasyndaǵy, sonyń ishinde Eýraziia ekonomikalyq odaǵy aiasyndaǵy qarym-qatynastar odan ári nyǵaiatynyna ózara senim bildirdi.
Sońynda taraptar óńirlik jáne halyqaralyq kún tártibindegi keibir máselelerdi talqylady.
