Qazaqstannyń Tuńǵysh Prezidenti Nursultan Nazarbaev astanada alǵash ret ótip jatqan Eýraziia elderi parlamenti spikerleriniń IV keńesin ashty. Óz sózinde Elbasy Qytaidyń bastamasy týraly aitty, dep habarlaidy Sputnik Qazaqstan.
"Biz Qytai halyq respýblikasynyń "Jańa Jibek joly" bastamasyn qoldaimyz. Sebebi osy bastama biz úshin tiimdi, biz teńiz joldaryna shyǵa bastadyq", - dedi Nazarbaev.
Eýropa men Aziianyń alpystan astam parlamenttik delegatsiialary qatysyp jatqan keńeste Nazarbaev Qazaqstannyń jetistikteri týraly aita kele, infraqurylymdyq jobalarǵa basa nazar aýdardy. Sebebi osy bastamalardyń arqasynda alys naryqtarǵa shyǵýǵa bolady.
"Bizdiń teńizge shyǵa alamasaq ta, aýqymdy infraqurylymdyq jospardy qolǵa aldyq. Qazirgi kezde osy jospardyń ekinshi besjyldyǵy bastaldy. Qysqa ýaqyttyń ishinde 15 myń shaqyrymnan astam avtomobil men temirjol jóndelip, jańadan salyndy. Osynyń arqasynda Tynyq pen Atlant muhittaryna, Kaspii arqyly Parsy shyǵanaǵyna shyqtyq", - dedi ol.
Tuńǵysh Prezidenttiń sózine qaraǵanda, búginde Qazaqstan arqyly Resei men Eýropaǵa ótetin konteinerlik tasymaldyń kólemi jyl saiyn eki esege artyp keledi.
"Bir sózben aitqanda, Qazaqstan Aziia men Eýropany, soltústik pen ońtústikti biriktirip otyrǵan tiimdi tranzittik memleketke ainaldy. Biz óz ekonomikamyzdyń tehnikalyq jáne tsifrlyq áleýetin barynsha kóterip jatyrmyz. Qazaqstan TMD men Shyǵys Eýropa elderi ishinde birinshi bolyp EKSPO-2017 kórmesin ótkizdi. Elordamyzda "Astana" Halyqaralyq qarjy ortalyǵy ashyldy. "Doing business" reitingisinde Qazaqstan 190 eldiń ishinde 28 oryndy alyp otyr", - dep atap kórsetti Nazarbaev.
