© Sputnik / Vladislav Vodnev
Tuńǵysh Prezident Nursultan Nazarbaev kezekten tys Prezident sailaýyna qatysa almaidy. Bul týraly vitse-ministr Alma Muqanova málimdedi, dep habarlaidy Sputnik Qazaqstan.
Konstitýtsiianyń qazirgi normasyna sáikes, Prezident qatarynan eki retten artyq sailana almaidy. Biraq Tuńǵysh Prezident Nursultan Nazarbaevqa sailaýǵa túsýge eshqandai shekteý qoiylmaǵan bolatyn. Alaida osy jazda ótken referendýmnyń nátijesi boiynsha Nazarbaev mundai quqyqtan aiyryldy.
"Respýblikalyq referendýmda qabyldanǵan túzetýlerge sáikes, Konstitýtsiiadan "prezidenttikke qatarynan eki retten artyq sailanýǵa bolmaidy degen talap Tuńǵysh Prezidentke qatysty qoldanylmaidy degen norma alynyp tastaldy", - dep túsindirdi Muqanova Májilis kýlýarynda.
Iaǵni Nazarbaev biyl kúzge josparlanǵan kezekten tys Prezident sailaýyna qatysa almaidy.
Eske salsaq, keshe Memleket basshysy Qasym-Jomart Toqaev biyl kúzde kezekten tys Prezident sailaýy ótetinin jariialady. Prezident saiasi dodaǵa qatysýǵa daiyn.
Sonymen qatar Toqaev Prezident mandatynyń uzaqtyǵyn 7 jyldyq bir merzimmen shekteýdi, iaǵni qaita sailanýǵa tyiym salynýdy usyndy.
