Prezident Nursultan Nazarbaev burynǵy ulttyq ekonomika ministri Qýandyq Bishimbaevtyń ustalýyna qatysty pikir bildirdi, dep habarlaidy Sputnik Qazaqstan.
"Jemqorlyqpen kúresti jalǵastyrý kerek. Eki jylda 2200 laýazymdy tulǵa qylmystyq jaýapkershilikke tartyldy. Olardyń ishinde ministrler, búkil deńgeidegi ákimder, vedomstvo basshylary bar", — dedi Nazarbaev.
Ol qazir sotta eks-ministr Qýandyq Bishimbaev pen "Qazavtojol" bas direktoryna qatysty qylmys is qaralyp jatqanyn atap ótti.
"Shyndyǵyn aitqanda, eks-ministr Qýandyq Bishimbaevty men óte aiaimyn. "Bolashaq" arqyly oqyttyq, oǵan úlken senim arttyq. Endi osylai bolyp otyr. Adamdardy daiyndaýǵa qanshama ýaqyt, aqsha jumsadyq. Árine, ókinishti", — dedi Nazarbaev.
Eske sala ketsek, Qýandyq Bishimbaevtiń isine qatysty sot Astanada ótken jyly jetinshi qarashada bastaldy. Onyń "Báiterek Development" isi boiynsha tergelip jatqany 2016 jyldyń sońyna belgili bolǵan edi. Ministr bolyp taǵaiyndalǵanǵa deiin ol "Báiterek" ulttyq holdingin basqarǵan bolatyn. Endi Bishimbaev osy ulttyq kompaniianyń tizginin ustaǵan ýaqytta memleket qarjysyn jymqyrdy jáne iri kólemde para aldy dep aiyptalyp otyr. Eks-ministr taǵylǵan kináni moiyndaǵan joq. Sotta jaýap bergen kezde Bishimbaev Elbasydan senimin aqtamaǵany úshin keshirim surady.
