Elimizde koronavirýstyq infektsiianyń taralýyna qarsy kúreske Qazaqstan Respýblikasynyń Tuńǵysh Prezidenti – Elbasy qorynan 200 million teńge bólinedi, dep habarlaidy "Ult aqparat" elbasy.kz-ke silteme jasap.
Bul qarajat Nursultan Nazarbaevtyń tikelei tapsyrmasymen bólinýde. Eldegi ahýal Elbasynyń jiti baqylaýynda.
«Búginde Qazaqstanda epidemiiaǵa qarsy is-sharalar tolyq kólemde júzege asyp jatyr. Bul áreketter qazirgi ahýalǵa sai jáne der kezinde qolǵa alyndy. Memleket teńdessiz sharalardy qabyldap otyr. Qaýipti indetpen kúreste otandyq biznes te qoldan kelgenshe kómektesýde. Men bul bastamany qoldap, áleýmettik jaýapkershilik tanytýǵa jáne bizdiń qoǵamnyń birligin kórsetýge shaqyramyn. Biz barlyq synaqtan súrinbei ótemiz. Biz birgemiz!», - delingen Qazaqstannyń Tuńǵysh Prezidentiniń tapsyrmasynda.
Bólingen qarajat Nur-Sultan men Almaty qalalary ákimdikteri arasynda teńdei úlestiriledi.
Qarjylyq kómek pandemiiaǵa qarsy kúreske jumylǵan meditsina qyzmetkerlerine syiaqy berýge, qosymsha meditsinalyq betperdeler men dezinfektsiialaý quraldaryn satyp alýǵa jumsalady. Sondai-aq, qarajattyń bir bóligi elordadaǵy balalar úileri men mamandandyrylǵan aýrýhanalardy azyq-túlikpen qamtamasyz etýge baǵyttalady.
Sonymen birge, qor basshylyǵy Nur-Sultan qalasynyń Qoǵamdyq densaýlyq saqtaý basqarmasyna 50 myń meditsinalyq betperde tapsyrdy.
Eske sala keteiik, buǵan deiin Nur Otan partiiasy jalǵyzbasty qarttar, múgedekter men kópbalaly otbasylarǵa kómek retinde 150 mln teńge baǵyttaǵan edi.
