Úkimet Prezidenttiń sharýashylyq basqarý salasyndaǵy 35 ókilettigin tómengi deńgeige berý jóninde zań jobasyn daiyndaidy. Bul týraly búgin QR Parlamenti palatalarynyń birlesken otyrysynda Elbasy Nursultan Nazarbaev málim etti, dep habarlaidy QazAqparat.
QR Prezidenti konstitýtsiialyq reformanyń mańyzdy máselelerine qatysty zań jobasynyń baǵyt-baǵdary aiqyn ekendigin basa aitty.
«Ondaǵy ózgerister qoǵamdy ary qarai demokratiialandyrýǵa baǵyttalǵan. Parlamenttiń rólin arttyryp, Úkimettiń derbestigi men jaýapkershiligin kúsheitýge arnalǵan jobalar. Ol quqyq qorǵaý, sot júiesi, konstitýtsiialyq baqylaýdyń negizderin de jetildiredi. Sonymen bul jobada Parlament talqylaýyna Konstitýtsiianyń 23-babyna ózgerister usynylyp otyr. Meniń tapsyrammen Úkimet Prezidenttiń sharýashylyq basqarý salasyndaǵy 35 ókilettigin tómengi deńgeige berý jóninde zań jobasyn daiyndaidy», - dedi Elbasy. Munan bólek, Memleket basshysy basqa da zańdarda kórsetilgen prezidenttiń ókilettikteri de Parlament pen Úkimettiń quzyryna beriletindigin atap ótti. «Zańdar da uzamai Parlamentke engiziletin bolady. Biz osy zańdar arqyly bilik tarmaqtary men olardyń arasyndaǵy ókilettikterdi barynsha tiimdi etip qaita bólemiz. Osynyń barly jahandyq jáne óńirlik syn-qaterlerge ýaqytyly jaýap berip, aldyn alý úshin jasalýda», - dedi Nazarbaev.
