Astanada ótip jatqan respýblika sýdialarynyń VII sezi barysynda Prezident Nursultan Nazarbaev sot júiesi úshin eń basty másele halyqtyń qaltqysyz senimi ekenin aitty, dep habarlaidy Baq.kz tilshisi.
«Negizgi másele – Qazaqstan halqynyń sotqa degen kózqarasy, qarym-qatynasy qandai? Kóńili kónshidi me? Barlyq máselelermen sotqa bara ma, álde áli kúnge deiin Prezidentke hat jaza ma?! Másele osynda. Biz reforma jasadyq, óittik-búittik dep otyrmyz, biraq eń birinshi másele halyqtyń sotqa senýi, sotqa barýy bolýy kerek. Baiaǵydan kele jatqan birdeme bolsa raikomǵa, obkomǵa barý, bastyqtarǵa jazý áli kúnge deiin toqtaǵan joq. Osy máselege kóńil bólý qajet», - dep qadap aitty Prezident.
Aita keteiik, Astanada respýblika sýdialarynyń VII sezi ótip jatyr. Mańyzdy jiynǵa sýdialar korpýsy, Parlament depýtattary, ortalyq memlekettik organdardyń basshylary, zańgerler qaýymdastyǵynyń, halyqaralyq uiymdardyń, úkimettik emes uiymdar ókilderi men álemniń 10-nan astam elinen kelgen sarapshylar - barlyǵy 600 delegat qatysyp jatyr.
Respýblika sýdialarynyń sezi 4 jylda bir ret ótedi. Táýelsizdik jyldary ishinde alty sezd (alǵashqysy 1996 jyly) ótti. Mańyzdy jiyn sot júiesiniń damýy úshin airyqsha strategiialyq mánge ie. Olardyń árbirinde sottar damýynyń qorytyndysy shyǵarylyp, ózekti máseleler boiynsha sheshimder qabyldanady.
