Qazaqstannyń Tuńǵysh Prezidenti Nursultan Nazarbaev Qazaqstan halqyna úndeý joldady. "Ult aqparat" Elbasy úndeýiniń tolyq mátinin jariialaidy.
***
Qazaqstan Respýblikasynyń Tuńǵysh Prezidenti – Elbasy N.Á.Nazarbaevtyń Qazaqstan halqyna ÚNDEÝI
Qymbatty otandastar!
Búginde bárimiz koronavirýstyń jahandyq pandemiiaǵa ulasqanyna kýá bolyp otyrmyz.
Qazir virýs jer sharyndaǵy 155-ten astam memlekettiń, sonyń ishinde Qazaqstannyń da aýmaǵyna taralýda.
Indettiń geografiialyq órisi úzdiksiz keńeiip, qurbandarynyń sany da ósip keledi.
Bul jaǵdaidy halyqaralyq ekonomikalyq daǵdarys – shikizat, valiýta jáne qarjy naryqtarynyń quldyraýy ýshyqtyra túsýde.
Munyń bári bizdiń eldi de ainalyp ótpeitini anyq.
Basqasha aitqanda, biz qazir «dúlei daýyl» dep sipattaýǵa bolatyn úlken qaýip-qater aldynda turmyz.
Sheshý joldaryn tabý turǵysynan kúrdeli bop otyrǵan qazirgi ahýal bir jaǵynan 1990-shy jyldardyń basyndaǵy jaǵdaiǵa uqsaidy.
Ol kezde biz shyn máninde óte qiyn jaǵdaida bolǵan edik.
Osyndai aýyr kezeńde men barlyq qazaqstandyqtardy el Prezidenti Qasym-Jomart Toqaev pen Úkimet tarapynan iske asyrylyp jatqan shuǵyl sharalardy qoldaýǵa shaqyramyn.
El biligi koronavirýstan qorǵaný úshin onyń aldyn alýǵa baǵyttalǵan keshendi sharalar qabyldady.
Bul rette tótenshe jaǵdaidyń jariialanýy – mańyzdy jáne qajetti qadam.
Ondaǵy maqsat – bizdiń azamattarymyz ben memleketimizdiń múddesin qorǵaý.
Qazir koronavirýs infektsiiasynyń zalalalyn azaitý jáne ekonomikany turaqtandyrý jónindegi arnaýly shtab jumys istep jatyr.
Azyq-túlik pen eń qajetti taýarlardyń, meditsinalyq maqsatqa arnalǵan zattardyń tapshylyǵyna jol bermeý úshin barlyq jaǵdai jasalýda.
Memlekettiń áleýmettik mindettemeleriniń bári de oryndalýda.
Eldegi quqyqtyq tártip qamtamasyz etilip otyr.
Otandyq kásipkerlerge, shaǵyn jáne orta bizneske jan-jaqty qoldaý kórsetilip jatyr.
Jumys oryndaryn saqtaýǵa barynsha kúsh salynýda.
Memlekettik deńgeide qabyldanyp jatqan sharalar qazirgi qiyn ahýalǵa sai der kezinde qolǵa alyndy.
Men muny tolyq qoldaimyn!
Sonymen qatar, qazirgi daǵdarys uzaǵyraq ýaqytqa sozylar bolsa, Úkimet oǵan qarsy sharalar ázirleýge tiis.
Ondai jaǵdaida elimizdi jáne azamattarymyzdy qatań únemshildikke, keshendi ornyqty damý baǵdaryna shyǵýǵa daiyndaý kerek.
Qurmetti qazaqstandyqtar!
Dana halqymyzda «Kemedeginiń jany bir» degen ulaǵatty sóz baryn bilesizder.
Osynaý syn saǵatta ortaq isten eshkim de syrt qalmaýǵa tiis.
Birinshiden, Úkimet biýdjet salasy qyzmetkerleriniń, stýdentterdiń, shaǵyn jáne orta biznestiń aýyrtpalyǵyn jeńildetý baǵytyndaǵy naqty qadamdaryn jariia etti.
Biraq tek qana memlekettiń kúsh-jigeri jetkiliksiz bolady.
Zaýaldy eńserý úshin basqa da qosymsha resýrstardy jumyldyrǵan jón.
Árbir azamat óziniń qolynan keletin úlesin qosýǵa tiis.
Men bul qiyn kezeńde el-jurtqa kómekteskisi keletin jáne járdem bere alatyn adamdardyń qarajaty jinaqtalatyn Respýblikalyq qor qurýdy usynamyn.
Osyndai jaǵdaida burynǵysha otandyq iri kásiporyndar da qoldaýyn kórsetedi dep senemin.
Ondai qorlardy árbir oblys ortalyǵynda jáne respýblikalyq mańyzy bar qalalarda qurý qajet.
Ol jumysty tiisinshe sol jerlerdiń ákimderi júzege asyrǵany durys.
Búkil halyq, qalyń el, jalpaq jurt bolyp jumylýdyń jarqyn úlgisi men tiimdiligin biz Arys qalasyn apattan keiin jedel qalpyna keltirgen kezde kórsetken edik.
Ekinshiden, men qazirdiń ózinde ulttyq biznes ókilderiniń el-jurtqa kórsetip jatqan kómegi úshin rizashylyǵymdy bildiremin.
Mundai márttik jalǵasyn taýyp, oǵan qosylatyn biznes ókilderiniń sany kóbeie túsedi degen úmittemin.
Kompaniialar ieleri ózderiniń qol astynda eńbek etip júrgen jandarǵa qarjylai da, moraldyq turǵydan da járdemdesedi dep senemin.
Máselen, ýaqytsha demalysqa jiberýge májbúr bolǵan jaǵdaida eńbekkerlerdi aqyly túrde bosatqan nemese qysqartylǵan jumys kestesine kóshken abzal.
Otandyq biznes ókilderin jaldamaly qyzmetkerlerdi jumystan shyǵarmaýǵa shaqyramyn.
Sizder jumys oryndaryn saqtaý arqyly qoǵamǵa qamqorlyqtaryńyzdy kórsetesizder.
Elimizdiń ken óndirisi men shikizat resýrstaryn óńdeý jáne ónerkásip salasyndaǵy iri investorlar da Úkimetpen, ákimdiktermen birlese otyryp, ózderi jumys istep jatqan óńirlerdiń turǵyndaryna qoldaý kórsetýge tiis.
Qiyndyqta qol ushyn berý – igi dástúr, halqymyzdyń qanynda bar, boiymyzǵa sińgen asyl qasiet.
Úshinshiden, qazirgi ýaqytta eń áýeli asa muqtaj jandarǵa kómek kórsetý kerek.
Meniń tapsyrmammen «Nur Otan» partiiasynyń jobalary aiasynda 150 million teńge bólindi.
Bul qarajat karantin jariialanǵan Nur-Sultan jáne Almaty qalalaryndaǵy áleýmettik jaǵdaiy tómen azamattarǵa ataýly kómek kórsetýge jumsalady.
Koronavirýs infektsiiasynyń taralýyna jol bermeý úshin meniń sheshimmen Tuńǵysh Prezident Qory esebinen taǵy 200 million teńge bólindi.
Jalpy, koronavirýsqa qarsy kúreske arnalǵan qarajattyń durys jumsalýyn «Nur Otan» partiiasy baqylaýynda ustaidy dep oilaimyn.
Tórtinshiden, úlken kisilerdi, balalar úii tárbielenýshileri men arnaýly aýrahanalardaǵy naýqastardy qajetti zattarmen úzbei qamtamasyz etýge basa kóńil bólgen jón.
Elimizdiń kómekke muqtaj árbir azamatyna qamqorlyq kórsetilýge tiis.
Qazaqstandyqtar qiyn kezeńderde árdaiym bir-birine járdemdesken.
Bul iske eriktiler qozǵalysynyń ókilderi de atsalysady dep senemin.
Besinshiden, biz pandemiiamen kúrestiń «aldyńǵy shebinde» júrgen dárigerler men medbikelerdi, quqyq qorǵaý organdary men áskeri qyzmetkerlerdi qoldaýymyz kerek.
Olardyń iyǵyna aýyr júk túsip, zor jaýapkershilik artylyp otyr.
Jurtshylyqtyń olarǵa kómektesip, túsinistik tanytýǵa jáne barlyq nusqaýyn jaýapkershilikpen oryndaýǵa tyrysqany jón.
Qadirli otandastar!
Bizdiń birligimiz – qazirgi qiyndyqty eńserýdiń kepili.
Táýelsiz Qazaqstan tarihynda budan da kúrdeli kezeńderdi bastan ótkerdik.
Barlyq aýyrtpalyqty jeńip, árdaiym ortaq Otanymyzdyń gúldenýi jolynda eńbek etip kelemiz.
Osy jolǵy synaqty da el bolyp eńseremiz dep senemin.
Qazaqstannyń joly qiyndyqsyz bolmaitynyn men táýelsizdiktiń bastapqy kezinde-aq bilgenmin.
Bul rette tarih pen ýaqyt bizdiń josparymyzǵa ózgeristerin engizetinin eskergen edim.
Jaima-shýaq kezderdiń ózinde de biz aldymyzdan shyǵýy múmkin syn-qaterlerge daiyndalyp, almaǵaiyp ýaqyttarda qajet bolatyn rezerv qalyptastyrdyq.
Jinaqtalǵan altyn-valiýta qory men Ulttyq qor qarajaty árdaiym bizdiń qabyldaǵan sharalarymyz ben jalpy ulttyq ekonomikany qoldaýǵa septigin tigizdi.
Qazir osy kúrdeli ahýaldan shyǵý úshin Qazaqstanda barlyq qajetti resýrs bar, qor da jetkilikti.
Bul – bizdiń «Aldymen ekonomika, sosyn saiasat» qaǵidatyna negizdelgen baǵyt-baǵdarymyzdyń naqty nátijesiniń biri.
Jańadan memleket qurý ońai emes, al ony syn-qaterden qorǵaý jáne táýelsizdikti saqtap qalý odan da qiyn.
Bizde tájiribe de, naqty is-áreket algoritmi de bar.
Men ultty uiystyrýdyń, birlik pen qoǵamdaǵy kelisimniń mańyzdylyǵyn únemi aityp kelemin.
Tutastyǵymyzdy taǵy bir ret dáleldeitin kún týdy.
Elimizdiń barlyq azamattaryn tózimdilik tanytýǵa, memleket qabyldap jatqan sharalardy qoldaýǵa shaqyramyn.
Birlik barda alynbaityn asý joq.
Kele jatqan Naýryz meiramy – bizdiń birligimizdiń nyshany.
Shýaqty mereke qarsańynda árbir shańyraqqa shattyq pen igilik tileimin!
Barlyq aýyrtpalyq bizdi ainalyp ótkei.
Qazaqstan bul qiyndyqty da eńserip, damýdyń jańa kezeńine aiaq basady dep nyq senemin.
Biz birgemiz!
